Otxarkoagako merkatuaren etorkizuna indartu da, kontzesioa luzatu eta bertako postu historikoetako bat berreskuratuta

Otxarkoagako Merkatuko kontzesioari jarraitutasuna eman izanak eta bertako postu historikoetako bat berritu izanak garai berri bat ekarri dute gaur udal-ekipamendu honetara. Izan ere, atzo goizean zabaldu zituen berriro ateak «Lagun Artean» saltokiak, agerian utziz auzoan egonkortu den merkataritza-proiektu bat dela, eta apustu irmoa egin dela topaleku, bizikidetza-gune eta jarduera ekonomikoaren ardatz nagusi den espazio honen etorkizunaren alde.

Atzo goizeko ekitaldian, Nora Abete Mugikortasun eta Jasangarritasun zinegotziak, Álvaro Pérez Osasun eta Kontsumo zinegotziak, eta Itziar Urtasun Berdintasuneko eta Jaietako zinegotziak, nabarmendu dute irekiera honek “udal-ekipamenduaren etorkizuna indartu eta merkatuak auzoko merkataritza- zein gizarte-bizitzan duen garrantzia bistaratzen duela”. Saltoki historiko hau berreskuratzeari esker, egun martxan dauden hamar postuetatik zortziren jarraitutasuna bermatuko da. “Azken helburua jarduera sustatzea, nortasunari eustea eta modernizazioan aurrera egitea da, betiere merkatuak zabaldu zenetik erakutsi duen hurbiltasuna eta zerbitzu publikoaren izaera aldatu gabe”, azpimarratu du Pérez zinegotziak.

Horregatik guztiagatik, eta kontzesioa luzatzeari esker, Bilbao Zerbitzuak-ek aurrera jarraituko du merkatuaren modernizazioan. Horretarako, erosketa-esperientzia hobetzera, digitalizaziora, irisgarritasunera eta ingurumen-jasangarritasunera bideratutako neurriak ezarriko ditu. Izan ere, azken urteotan, eredu jasangarriago eta eraginkorrago baterantz jotzeko asmoz, Bilbao Zerbitzuak-ek eguzki-panelez osatutako instalazio fotovoltaiko bat jarri du eraikineko fatxadan eta Ángela Arregui plazako pergolan. Horrez gain, gaur egun hutsik dauden espazioei erabilera berriak emateko ahalegina egingo da orain, jarduera sustatzeko, eta ekimen berriak erakartzeko, ekipamendu honek auzoarentzat duen balioa indartuz.