Bilboko eta Deustuko hilerriek goizeko 8etatik arratsaldeko 18etara izango dituzte ateak zabalik, etenik gabe

Azaroaren 1ean Bilboko Hilerriko Kaperara hurbiltzen direnek Bilbao Zerbitzuak-ek urtero antolatzen duen ohiko kontzertu lirikoaz gozatu ahal izango dute, Bilbao Bel Canto taldearen ahots ezagunen eskutik

Domu Santu Egunaren ospakizuna dela eta azaroaren 1ean, eta Bilboko eta Deustuko hilerrietan espero diren ehunka bisitak ikusita, Bilbao Zerbitzuak-ek, urteroko legez, antolaketa berezia jarriko du abian; zerbitzuak sendotzeko, esparruko egonaldia atsegina izateko eta familiei arreta bikaina eskaintzeko. Edonola ere, eta jendetza biltzea saiheste aldera, herritarrei begirunez eskatzen zaie, ahal den neurrian, aurretik, mailakatuta eta garraio publikoa erabiliz bertaratzeko.

«Egun hauetan, gure hilerriek beren senideak gogoratzera datozen familia ugari hartzen dituzte. Bisita lasai egitea nahi dugu, ingurune zaindu batean eta behar duten laguntza zein arreta bermatuta izanik”, adierazi du Álvaro Pérezek, Bilboko Udaleko Osasun eta Kontsumo Saileko zinegotziak. Hori dela eta, eta bisitaldia, ahal dela, are bereziagoa izan dadin, Bilboko Hilerriko Kaperan urtero Bilbao Zerbitzuak-ek antolatzen duen ohiko kontzertu lirikoa izango da.

Musika-ekitaldiaren bederatzigarren edizio honi 13:00etan emango zaio hasiera, eta Bilbao Bel Canto taldearen ahots ezagunek girotuko dute hitzordua. Patricia Sesar sopranoak eta Martín Barcelona tenorrak jarriko diote ahotsa emanaldiari, Zuriñe de Diegoren biolinaren, Miren de Diegoren biolaren eta Iñaki Belaskoren pianoaren doinuek lagunduta. Gainera, bertaratzeko aukerarik ez dutenek ere ez dute zertan saioa galdu, kontzertuaz zuzenean gozatu ahal izango baitute etxean, Telebilbao tokiko telebista-kateari esker.

Nolanahi ere, giroa berotzen joateko, kontzertuaren aurretik, 12:00etan, Bilboko apezpikuak meza bat emango du kapera bertan.

Ordutegi bereziak

Bilboko hilerrietara joan nahi dutenek goizeko 8etatik arratsaldeko 18etara izango dituzte ateak zabalik, etenik gabe. Gainera, azaroaren 1ean bulegoetako aurrez aurreko arreta ere indartu egingo da. Hori dela eta, Bilboko udal-hilerrian beste langile bat egongo da jendeari laguntzeko 11etatik 17etara; Deustukoan, berriz, Bilbao Zerbitzuak-eko lanbideetako langile bat arituko da familiei zerbitzua ematen 10etatik 14etara.

Bilboko Hilerriak beste urte batez bat egingo du Haurdunaldiko, Jaiotza inguruko eta Jaio ondoko Doluaren Kontzientziazioaren aldeko Munduko Egunarekin, eta arrosaz eta urdinez argiztatuko da, haurdunaldian edo jaio ondoren haurra galdu duten edo galtzen ari diren emakumeei eta familiei babesa eta errekonozimendua adierazteko.

Ekimena, Esku Hutsik elkartetik abiatuta, haurdunaldiko, jaiotza inguruko eta jaio ondoko dolua laguntzen eta ikusarazten duen elkartea Euskal Autonomia Erkidegoan eta Nafarroako Foru Komunitatean, hirian ere sentituko da. Gaurko gauan Arriaga antzokia, La Bolsa eraikina, Moyua plazako iturria eta Casilda Iturrizar parkeko pergolako iturria euren itxura aldatuko dute, arrosaz eta urdinez argiztatuz dolu perinatalari elkartasuna adierazten.

Askotan isilpean bizi den dolu-prozesu hau ikusarazten laguntzeko helburuarekin, Bilbao Zerbitzuak-ek Izarren Lorategia izeneko espazioa eraiki zuen duela hiru urte Bilboko hilerrian, gurasoek eta senideek haurdunaldian, erditzean edo jaio eta gutxira hil ziren ume guztiak gogoratu ditzaten.

Sari honek Bilbao Zerbitzuak-ek 2022tik bultzatutako ingurumen-estrategia berresten du; zeinak hilerria erreferente bilakatu duen jasangarritasunaren, irisgarritasunaren eta biodibertsitatearen alorretan

Bilbao Zerbitzuak-ek Bilboko Hilerrian bultzatutako ingurumen-eraldaketarako prozesuak beste aintzatespen bat jaso du. Espazio honek bigarren saria lortu zuen atzo Espainiako Hilerrien Lehiaketaren hamargarren edizioko Natura Bizia kategorian, zeinak gune historiko horiek jasangarritasunaren, irisgarritasunaren eta biodibertsitatearen kontserbazioaren alorretan erreferente bihurtzeko garatutako ekimenak nabarmentzen dituen.

“Hainbat urte daramatzagu Bilboko Hilerria hiriko berdegune handi gisa indartzeko lanean, eta aintzatespen honek norabide egokian aurrera egiten ari garela berresten du”, adierazi du Álvaro Pérez Bilboko Udaleko Osasun eta Kontsumo zinegotziak.

Izan ere, jasotako sariak balioan jarri du Bilbao Zerbitzuak-ek 2022an abiatutako ingurumen-estrategia, hilerri berdeago eta ingurunearekin errespetuzkoagoa den eredu baterantz pausuak emanez. Garatutako jarduketen artean, energia berriztagarrien aldeko apustua nabarmentzen da, esparruko hainbat eraikinetan 266 eguzki-plaka bifazial jarri baitira; horri esker, 201 MWh baino gehiagoko energia-aurrezpena lortu da eta atmosferara ia 150 tona CO₂ isurtzea saihestu da. Jarduketa horri 2026 hau amaitu baino lehen biltegiratze industrialerako bateria gehituko zaio, sortutako energiaren aprobetxamendua optimizatzeko helburuarekin.

Mugikortasun jasangarriagoa sustatzeko neurriak hartu izana epaimahaiak gehien baloratu duen beste alderdietako bat izan da. “Zerbitzuko bederatzi ibilgailu ordezkatu dira % 100 elektrikoak diren modeloekin, mantentze-taldeen makineria berritu da beste elektriko batzuk erabiliz, kutsatzen ez duten ibilgailuen erabilera bultzatu da eremuan bertan jarritako karga-puntuen bidez, eta mugikortasun murriztua duten pertsonen eskura doako lau gurpil-aulki elektriko jarri dira, haien joan-etorriak errazteko asmoarekin”, zehaztu du zinegotziak.

Biodibertsitatea sustatzeko egindako lanak ere pisu handia izan du hautagaitzan. Belazeetako sega-maiztasuna 40.000 metro karratu baino gehiagotan murrizteari esker, balio ekologiko handiko naturguneak berreskuratu eta espezie ugarirentzako babesleku egokiak sortu dira. Horrez gain, faunarentzako babesgune bat sortu da; gune horrek intsektuentzako hotelak, habientzako kutxak, iturriak eta urmael natural bat ditu, hegaztiak, anfibioak eta intsektu polinizatzaileak kontserbatzen laguntzeko.

Aintzatespenak ere proiektu honen dibulgazio-alorra azpimarratu du. Izan ere, azken urteotan Bilbao Zerbitzuak-ek hilerriaren aberastasun naturala ezagutzera emateko hainbat lan argitaratu ditu, eta bisita gidatuen programa zabaldu du, esparruko floran eta paisaian zentratutako ibilbide berri batekin. Proposamen horri esker, herritarrek ondare-espazio honen beste alderdi bat ezagutzeko aukera izan dute.

“Sari honek memoriaren babesa eta ingurumenaren zainketa bateragarri egin nahi dituen lan-ildoa aitortzen du, esparru hau herritarrentzat gero eta jasangarriagoa, irisgarriagoa eta irekiagoa den gune gisa finkatuz”, gehitu du Pérezek.

Hemendik aurrera, Deustuko hilerrira sartu nahi dutenek arratsaldeko seiak arte (18etan) izango dute horretarako aukera. Orain arte, Domu Santu egunean izan ezik, hilerria arratsaldeko hiruretan (15etan) itxi ohi zen, baina ordutegi hori aldatu egin da itxiera 18etara luzatuz.

“Aldaketa honen bidez, bisitak erraztu eta herritarrei sarbidea hobetu nahi zaie, Deustuko auzokideentzat erro handiko lekua baita”, adierazi du Alvaro Perez Osasun eta Kontsumo zinegotziak.

Ibarrekolanda auzoan dagoen Deustuko hilerriak, Arangoitiko magalean, 617 emakida ditu gaur egun, eta lotura estua du auzoko familien historia zein memoriarekin. 1894an inauguratu zen, eta, gaur egun, lehendik zeuden emakidekin lotutako lurperatzeak baino ez dira egiten. Ingurune berezia gorde du hilerriak, eta berdeguneak, nitxoak zein panteoi historikoak ditu ezaugarri.

• Bigarren saria Expressak taldearen “Hemen zaude?” lanarentzat izan da; ikusleen saria, berriz, Los Blue taldearen “Salir del nicho” filmak eskuratu du
• Oraingoan, epaimahaiak aurkeztutako lanen jatorrizko izaera eta kalitatea azpimarratu ditu, 13 talde bildu dituen edizio honetan

Distópicos anónimos taldeak Bilboko Udal Hilerriari buruz erakutsitako ikuspegiak epaimahaia bereganatu du Bilbao Zerbitzuak-ek antolatutako III. Film Laburren Lehiaketan. Haren “Encuentro” lanak eskuratu du gaur arratsaldean lehen saria; edizioz edizio, ondarezko esparru hau ikus-entzunezko sorkuntzarako iturri gisa sendotzen duen lehiaketan, hain zuzen.

Hilerriko kapera nagusian egindako sari-banaketak eta lan finalisten proiekzioak eman dio amaiera borobila edizio berri honi, zeinean parte hartu duten taldeek, oso ikuspegi anitzetatik abiatuta, Bilboko hilerriko harresien artean ezkutatzen diren paisaiak, istorioak eta emozioak jaso dituzten.

“Edizio bakoitzak leku hau interpretatzeko modu berriak dakartza. Aurkeztutako film laburrek argi uzten dute hilerria ez dela espazio hotz bat, kultura, memoria eta sormena biltzen dituen gunea baizik, oso istorio ezberdinak sortzeko gaitasuna duena”, adierazi du Álvaro Pérez Bilboko Udaleko Osasun eta Kontsumo Saileko zinegotziak.

Bi egunez, 13 taldek hilerria filmazio-plato berezi bihurtu dute, hiriko espazio enblematiko honen ondare-, arkitektura- eta giza aberastasuna islatzen duten istorioak jasoz. Hain zuzen ere, Bilboko historiari estuki lotutako inguru honen irakurketa berriak ezagutarazteko gaitasun hori izan da epaimahaiak gehien baloratu duen alderdietako bat, eta bigarren saria Expressak taldeari eman dio, “Hemen zaude?” lanagatik.

Bere aldetik, ikusleen bihotza bereganatu du Los Blue taldearen “Salir del nicho” lanak, proiekzio-saioan jaialdiko babesik handiena jaso ondoren; guztira, 27 botorekin eskuratu baitu herritarren saria. Eta zuzendari gazte onenaren akzesita Oralai taldearen “Te acompaño” obrak jaso du.

Saritutako film laburrak Bilbao Zerbitzuak-en arte-bildumaren parte izatera igaro dira, eta dagoeneko ikusgai daude bilbaozerbitzuak.bilbao.eus webgunean.

• Parte hartu nahi dutenek datorren irailaren 17ko 12ak arte izango dute izena emateko aukera, Bilbao Zerbitzuaken webgunearen bidez
• Lehiaketa irailaren 18tik 20ra bitartean egingo da, eta gehienez bost laguneko taldeek parte hartu ahal izango dute. Lanek hiru minutu irauteko aukera izango dute gehienez, eta lehiaketak irauten duen egunetan bertan aurkeztu beharko dira

Bilboko Udal Hilerriko Film Laburren III. Lehiaketan parte hartzeko atzerako kontaketa hasi da dagoeneko. Lehiaketa honetan parte hartu eta hiriko gune ikoniko hau zinema-eszenatoki bihurtu nahi dutenek datorren osteguneko, hilaren 17ko, 12ak arte izango dute izena emateko aukera, Bilbao Zerbitzuaken webgunearen bidez eta bertan oinarriak kontsultatu ahal izango dira.

“Lehiaketa hau aukera ezin hobea da hilerria sormenaren eta kulturaren ikuspegitik ezagutzeko. Aurreko bi edizioetan argi geratu da parte-hartzaileek harritzeko gaitasun handia dutela, proposamen originalak eta begirada askotarikoak ekarrita”, adierazi du Álvaro Pérez Alonsok, Bilboko Udaleko Osasun eta Kontsumo Saileko zinegotziak.

Lehiaketa irailaren 18tik 20ra bitartean egingo da, eta gehienez bost laguneko taldeek parte hartu ahal izango dute. Lanen iraupena hiru minutukoa izango da, gehienez, eta egun horietan bertan entregatu beharko dira. Film laburrak euskaraz zein gaztelaniaz aurkez daitezke (baita bietan ere), eta epaimahaiak proposamenen originaltasuna eta kalitate tekniko nahiz narratiboa hartuko ditu kontuan.

“Ikasleak, ikus-entzunezkoen zaleak eta sortzaileak ekimen honetan parte hartzera animatu nahi ditugu. Izan ere, hilerria istorio berriak inspiratzeko eta ondare-ingurune berezi batean proiektu zinematografikoak garatzeko gune paregabea da”, adierazi du zinegotziak.

Sari-banaketa kaperan

Edizio honetan ere, sariak ekitaldi publiko batean banatuko dira, Hilerriko Kaperan, urriaren 2an, 19etan. Ekitaldian zehar, hautatutako lanak pantailaratuko dira, eta bertaratutakoek gogokoen duten film laburraren alde bozkatzeko aukera izango dute, Publikoaren Saria nori eman erabakitzeko.

Horrenbestez, lehiaketak 1.000 euroko lehen saria eta 500 euroko bigarren saria banatuko ditu. Horrez gain, 18 urtetik beherako parte-hartzaileek zuzendari gazte onenaren akzesita eskuratu ahal izango dute, eta ikusleek gogokoen duten lanak Publikoaren akzesita jasoko du (200 eurokoa).

• Kontzertua datorren irailaren 13an izango da, 12etan, eta belaunaldiz belaunaldiko obren bilduma zaindua hurbilduko dio publikoari; musika klasikoaren unibertsoaren parte izaten jarraitzen duten lanak
• Emanaldia Bilbao Zerbitzuakek urtero antolatzen duen kultur egitarauaren barruan dago

Bilboko Udal Hilerriko Kaperak musika klasikoaren melodia ezagunenak hartuko ditu berriro ere, Iñaki Bermudez saxofoi-jotzaile bizkaitarraren eta Yume Takasaki piano-jotzaile japoniarraren eskutik. Kontzertua, “Munduko Kantuak” izenburuarekin, irailaren 13an izango da, 12etan. Bertaratzen direnek musikaz gozatzeko aukera paregabea izango dute, historia, artea eta memoria uztartzen dituen ingurune berezi honetan.

Bilboko hilerrian emandako aurreko kontzertuen ostean, bi artistak bueltan datoz musika-proposamen berri bat eskaintzeko; bertan, saxofoiak eta pianoak elkarrekin hitz egingo dute, musika klasikoaren historia markatu duten konposizioen bidez. Kontzertua Bilbao Zerbitzuakek urtean zehar Bilboko Udal Hilerrian antolatzen duen kultur egitarauaren barruan kokatzen da.

“Kontzertu honen edizio bakoitzak argi uzten du hilerriko kaperan musika klasikoaz gozatzeko ekimenak herritarren artean pizten duen interesa. Iñaki Bermudezen eta Yume Takasakiren maila artistikoari eta prestatu duten egitarau erakargarriari esker, musikazaleek eta gune honetara beste ikuspegi batetik hurbildu nahi dutenek interes handiko kultur proposamena izango dute hitzordu honetan”, nabarmendu du Bilboko Udaleko Osasun eta Kontsumo Saileko zinegotzia Álvaro Pérez Alonsok.

Nazioarteko oihartzuna duten artistak

Bermudez Sopelan jaio zen, eta Espainian, Belgikan eta Frantzian egin du bere ibilbidea. Bartzelonako, Bruselako eta Pariseko goi-mailako musika-ikastegi entzutetsuetan trebatua, bakarlari-lana eta ganbera-musikako proiektu ugari uztartzen ditu, eta nazioarteko hainbat lehiaketatan saritu dute. Gainera, irakasle gonbidatu gisa, lan pedagogiko handia egiten du hainbat herrialdetako kontserbatorioetan eta topaketa espezializatuetan.

Bestalde, Takasakik oso goiz hasi zituen musika-ikasketak bere jaioterrian, Yokohaman. Ondoren, Tokioko Musika Eskolan eta Parisko Goi-Mailako Musika eta Dantza Kontserbatorio Nazionalean jarraitu zuen trebatzen, eta pianoan zein ganbera-musikan espezializatu zen. Bere ibilbide profesionalean, Frantziako eta nazioarteko hainbat talde eta bakarlarirekin aritu da elkarlanean.

“Biek urteetan zehar eraiki duten konplizitate artistikoari esker, eta errepertorio klasikoko obra handiak publikoari hurbiltzeko egin duten apustuari esker, haien emanaldi bakoitza musika-esperientzia zaindua eta gertukoa da”, azpimarratu du zinegotziak.