Uda eta hondartza-garaia iristearekin batera, pasta- eta arroz-tupperrak, eguzki-kremarekin eta ur-botilekin batera, ezinbesteko osagarri bihurtzen dira, erlaxatu eta eguzki-izpiak gozatzeko, eguna hondartzan edo igerilekuetan igarotzen duten pertsona guztientzat. Horregatik, Bilboko Goi Mailako Ostalaritza Eskolak (ESHBI) hainbat tailer emango ditu Erriberako Merkatuko Sukaldaritza Eskolan oinarrizko jaki horiek goi-mailako plater bihurtuko dituzten errezeta berriak irakasteko.

“Erriberako Merkatuan ematen diren sukaldaritza-ikastaroei esker, bilbotarrek modu berritzailean ikasiko dute errezetak egiten; izan ere, aukera osasungarri eta elikagarri ugari landuko dituzte, Bilboko Udal Merkatuetako tokiko produktuek ematen duten zapore paregabearekin”, adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi Ordezkariak.

Uztailaren 5etik aurrera, eta hileko astearte guztietan, Mikel Escudero ESHBIko sukaldariak lau sukaldaritza-tailer emango ditu, 18:30etik 20:30era, pasta eta arroz platerrak prestatzeko. Lehenengo saioan landuko diren errezetak Gnochia gazta- eta pesto-saltsarekin eta carbonara pastarekin izango dira. Bigarren saioa uztailaren 12an izango da, pasta freskoa egiten ikasteko. Hirugarren eta laugarren saioetarako (uztailak 19 eta 26), risottoa eta arroz saldatsua saltsa berdean dauden txirlekin eta arroza ahatearekin eta gari-zainzuriekin; eta arroza bakailaoarekin curry erara tailerrak daude aurreikusita, hurrenez hurren.

Sukaldaritza tailerrei buruzko informazio gehiago

Erriberako Merkatuak “Swisstainable on Tour” erakusketa ibiltaria hartuko du, Suitza jasangarriena eta ekologikoena ezagutarazteko. Suitza Turismok, Friburgo eskualdearekin, Leman Lakuarekin, Basileako hiriarekin eta Suitzako trenekin lankidetzan antolatutako erakusketa, Erriberako Merkatuko sarrera nagusiaren atariaren erdian egongo da, beheko solairuan. 11 metroko luzera eta 6 metroko zabalera duen atoia daraman bizikleta elektriko batek osatzen du.

“Plazerra da “Swisstable on Tour” erakusketa bezalako ekimenetan parte hartzea; izan ere, Erriberako Merkatua hiribilduaren mugetatik haratago ezagutarazteko aukera ematen du, jasangarritasuna eta bizimodu ekologikoa sustatzen diren bitartean. Bi ezaugarri horiek gure Udal Merkatuen nortasunaren parte dira”, adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi Ordezkariak.

Erakusketak estatuko hainbat hiri zeharkatu ditu, Madril, Bartzelona eta Valentzia, besteak beste, Suitzako turismo arduratsuari balioa emanez eta hura sustatuz. Gainera, ekimen hau pertsonengana hurbiltzeko asmoz, Suitza Turismok Suitzara bidaia baten zozketa egingo du.

Irabazi bidaia bat Suitzara

Suitza Turismok zozketa bat egitea erabaki du. Zozketa horretan jende guztiak parte hartu ahal izango du eta irabazleek Suitzara bidaia bat jasoko dute opari. Parte hartzeko, inprimaki hau bete beharko da.

Yolanda Diez alkateorde eta Bilboko Udaleko Osasun eta Kontsumo Saileko zinegotzi ordezkariak 2021-2022 ikasturteko balantzea eskaini du, gaurko ibilbidean parte hartu duten ibiltariekin Zabalguneko Udal Merkatuan egindako gosari osasungarri batean.

Osasuna sustatzeko doako udal programa hau herritar guztientzat da, eta 5.040 parte hartzaile izan ditu, eta 175 saio egin dira, 2021eko urriaren 4tik ekainaren 29ra arte.

Ikasturte honetan gogokoen izan diren ibilbideak, berriz, Kañu pasealekua, Itsasadarreko pasealekua, San Mames, Ametzola eta Hiru Parkeak izan dira.

Yolanda Diez alkateorde eta Osasun eta Kontsumo Saileko zinegotzi ordezkariak Ibiltarien Sarearen ikasturteko azken jardunaldian parte hartu du gaur goizean. Díezek gaurko ibilbideko parte hartzaileei egin die harrera, eta geraldi bat egin dute bidean, indarrak berritzearren Zabalguneko Udal Merkatuan gosari osasungarri bat eginez.

Zabalguneko Udal Merkatuko ahamen osasungarria fruta freskoarekin eta urarekin egin da, berriro eguneko ibilaldiari ekin aurretik monitoreekin batera.

Yolanda Diezek ikasturtearen balantze labur bat egin du, eta pozik agertu da “urtetik urtera parte hartzaileen artean arrakasta handia izaten ari den programarengatik”, zeinak, ibilaldiok egiten dituzten pertsonen osasunerako onuragarri izateaz gainera, harremanetarako aukera ere ematen baitu, eta, hala, onura bikoizten. Osasun eta Kontsumo Sailaren arduradunak hau gogorarazi du, orobat: “parte hartzaileen batez besteko adina 65 eta 70 urte artekoa den arren, gure erronka da herritar guztiek probatzea Ibiltarien Sarea, duten adina dutela”.

Osasuna sustatzeko udal programa hau doakoa da, eta iragan urrian hasi zen, eta ekainaren 29an amaituko; herritar guztientzat da. Ikasturte honetan, 175 saio antolatu dira, eta 5.040 pertsonak parte hartu dute (batez beste, 32 pertsona).

Udal merkatuek bat egin dute ibiltarien sarearekin

Programa astelehenetik ostiralera garatu izan da, 11:00etatik 13:00etara, eta profesionalak izan ditu beti zuzendari eta laguntzaile. Programak 15 ibilbide izan ditu, eta txandaka egin dira; interesdunek “Bilbo ezagutzeko ibilbideak osasuna zaintzen duzun aldian” izeneko gidan ikus ditzakete, zeina Bilboko Udalaren Osasun eta Kontsumo Sailak argitaratu baitu, eta dagoeneko eskura baitaude udaltegien sarean eta Udalaren web-orrian.

Bestalde, osagarri moduan, ikasturte honetan hiru ikustaldi egin dira udal merkatuetan, erakustearren zeinen ardura handikoa den gorputz jarduerarekin batera modu osasungarrian elikatzea, bizimodu osasungarri bat izatearren eta ekonomia zirkularra eta gertuko produktuen kontsumoa sustatzearren. Abenduan, ibiltariek geraldi bat egin zuten Labayruko udal merkatuan; apirilean, Otxarkoagakoan; eta, gaur, ekainak 10, Zabalgunekoan.

Arrakasta handiena duten ibilbideak

Aurten ere, aurreko urteetan bezala, ibilbide gogokoenak Kañu pasealekua, Itsasadarreko pasealekua, San Mames, Ametzola eta Hiru Parkeak izan dira. Batez beste parte hartzaile gutxien izan duten ibilbideak, bestalde, desnibelagatik zailenak zirenak izan dira (Arnotegi, Artxanda), eta hirigunetik urrunen doazenak (Ollargan eta Larreagaburu)

“Zure osasunagatik, mugitu zaitez modu jasangarrian”

Ikasturtea hasi aurretik, irago irailean, Mugikortasunaren Astea ospatu zen, Europako Batzordeak 2021eko kanpainarako hautatutako goiburuarekin: “Mugikortasun jasangarria, osasungarria eta segurua”, eta goiburua, “Zure osasunaren alde, mugitu modu jasangarrian”. Europako Batzordeak osasuna nabarmendu nahi izan zuen, bai gorputz osasuna, bai buruko osasuna, gure udalerrietan batetik bestera modu jasangarrian ibiltzeko moduekin lotuz hura, eta Bilboko Udalaren Osasun eta Kontsumo Sailak bat egin zuen kanpaina horrekin. Hala, bada, Bilboko 4 parketatik abiatuta (Abusu, Etxebarria, Deustu eta Kasilda Iturrizar), mugikortasun aktiboko eta bizimodu osasungarriko jardunaldi baterako proposamen bat egin zen, gorputz ariketa eta modu osasungarrian elikatzea hartuta ikuspuntutzat, helmuga Erriberako Merkatuan izanik.

Uda hastear dagoen honetan, Bilboko Ostalaritza Goi Eskolak (ESHBI) Erriberako Merkatuko Sukaldaritza Eskolan emango diren tailer gastronomikoen eskaintza berria egin du. Mikel Escudero ESHBIko sukaldariak emango ditu ikastaroak, eta lau saio izango dira uztailean zehar.

«Beroa iristen denean, entsaladak, krema hotzak eta plater freskagarriak dira nagusi etxeetako jantokietan. Horregatik, Bilbao Zerbitzuak-etik sukaldaritza-ikastaroetara joatera eta gure udal-merkatuetako sasoiko produktuetatik abiatuta egindako errezeta berriak ikastera animatzen ditugu herritarrak” adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi Ordezkariak.

Ikastaroa uztailaren 6, 13, 20 eta 27an, 18:30ean, Erriberako Merkatuko bigarren solairuan dagoen Sukaldaritza Eskolan egingo diren lau klase praktikoz osatuta dago. Lehenengo klasean hegaluzea tipularekin eta atun gorria tatakiarekin prestatuko dira. Uztailaren 13an, asteazkenean, sukaldariak gazpatxo errezeta eta Vietnamgo biribilki hotza egiten erakutsiko du. Hirugarren astean, itsasoak Sukaldaritza Eskolako sukaldeak bisitatuko ditu bi errezetarekin, otarrainxkak limarekin eta albaka txipi beteekin. Azkenik, laugarren saioak azken ukitua emango dio ikastaroari, eta bertan kuiatxo-krema curryarekin eta kokoarekin eta muxika eta basoko fruituekin egindako bizkotxoa prestatzen ikasteko aukera eskainiko da.

Informazio gehiago

Ekainaren 2an, 9an eta 16an, Erriberako Merkatuko Sukaldaritza Eskolak, Bilboko Ostalaritza Goi Eskolarekin (ESHBI) lankidetzan Bilbao Zerbitzuak-ek joan den hilean inauguratu zituen Sukaldaritza Osasungarriko Tailerren hiru saio praktiko hartuko ditu. Bilboko Udaleko Osasun eta Kontsumo Sailak antolatutako tailerrek bilbotarrek elikadura hobetzeko eta ohitura osasungarriak hartzeko trukuak eta aholkuak ikasteko balioko dute.

“Errezeta eta sukaldeko truku berriak ikasteaz gain, tailerretara doazenek elikadura osasungarriari buruzko kezkak eta soluzio praktikoak partekatzeko aukera izango dute», azaldu du Yolanda Díez Bilboko Udaleko Alkateorde eta Osasun eta Kontsumoko Zinegotzi Ordezkariak.

Klase teorikoaren ondoren, bertaratutakoek ikasitakoa praktikan jartzeko aukera izango dute eta, hala, Udal Merkatuetako postuek eskaintzen dituzten tokiko eta kalitatezko produktuez baliatuz, plater zaporetsu eta osasungarriak egin ahal izango dituzte. Gainera, ekainaren 14an, giltzurrunetako gaixotasuna duten pertsonentzako tailerra eskainiko da. Bertan, jarraibide dietetikoak eskainiko dira, pazienteek euren elikadura gaixotasunaren faseko beharrizan espezifikoetara egokitu ahal izan dezaten.

Ekainean zehar egingo dute, udak berezkoa duen bizi-erritmora egokitzeko.

Udaren atarian, Bilboko etxeetan hain gustuko dituzten sasoiko elikagaiak Erriberako, Zabalguneko, Deustuko, San Inazioko, Labayruko, Otxarkoagako eta Traukoko udal merkatuetako postuetara iristen hasi dira. Uda garaiak dakarren bizimoduaren erritmora egokitzeko, datorren asteazkenetik aurrera, udako hilabeteetan, ekainaren 1etik aurrera, Hiriko udal merkatuek ordutegia egokituko dute.

“Elikadurak funtsezko zeregina du gure osasunaren egoeran, eta udan ez dugu alde batera utzi behar zaintza hori. Osasun eta Kontsumo Sailetik gure merkatuetan erosketak egitera animatzen ditugu herritarrak, kalitatezko elikagaiak, tokikoak eta guztiz osasungarriak erosteko leku aparta direlako”, adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi Ordezkariak.

Udal Merkatuak ordutegien aldaketa txiki batzuekin hasiko dira ekainetik aurrera. Ez dute ordutegi aldaketa aldi berean egingo eta, are gehiago, ohiko ordutegiarekin jarraituko duten bi ere egongo dira: Zabalguneko eta Traukoko merkatuak. Erriberako eta San Inazioko merkatuen kasuan, irekiera-ordutegi berria hilaren 14an hasiko da, eta Deustuko merkatuan, berriz, egun bat geroago. Labayrun, ordutegiaren aldaketa bi hilabete inguru egongo da indarrean, uztailaren 4tik irailaren 7ra.

Shipra Khanna Influencer eta Masterchef India 2012ko irabazleak Erriberako Merkatua bisitatu du eta euskal ohitura gastronomikoak erakutsi dizkie sare sozialetan dituen bost milioi jarraitzaile baino gehiagori, baita merkatu honek dituen espazio zoragarriak ere.

“Beti da atsegina Shipra Khanna bezalako bisita bereziak izatea, baita Bilbotik milaka kilometrora bizi diren pertsonengana iristea eta gure Udal Merkatuek dituzten produktu bikainak eta bitxikeriak erakustea ere”, adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi Ordezkariak.

Jatorriz Shimplakoa den chefa Erriberako Merkatuan ibili da postuen, inguruen, gastro-tabernen eta janariaren beraren bideoak grabatzen. Gainera, bere sukaldaritzako ezagutzak partekatu ditu merkatariekin, gastronomia kulturartekotasunerako eta fusiorako elementu gisa balioetsiz. Shipra, “The Space Trail” izenekoaren sortzailea izateaz gain, Masterchef Travelen sukaldaritzako enbaxadorea ere bada, eta sukaldaritzako 8 liburu argitaratu ditu. “Basqyium” eta “Bilbao Urban & Cities Design” enpresek gauzatu duten euskal eta indiar sustraien arteko kulturari lotutako proiektuaren barruan iritsi da Bilbora.

Erriberako Merkatuko Sukaldaritza Eskolak Asiara bidaiatuko du uztailean, Mikel Escudero Bilboko Ostalaritza Goi Eskolako (ESHBI) chefaren eskutik, sukaldaritza mota ezberdinetako bost tailerren bidez.

“Erriberako Merkatuko Sukaldaritza Eskola leku ezin hobea da nazioarteko sukaldaritzako ikastaro hauek emateko, ditugun instalazio eta baliabideei esker, bai eta gure Udal Merkatuetako postuek eskaintzen dituzten elikagaien kalitateari eta aniztasunari esker ere”, adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi Ordezkariak.

Lehenengo ikastaroa maiatzaren 28an izango da, 11:00etan, eta bertaratzen direnek bi Ramen errezeta prestatzen ikasi ahal izango dute, Shoyu Ramen errezeta bat eta Miso Ramen beste bat.

Bigarren ikastaroa ekainaren 2an eta 9an izango da, ostegunak, 18:30etik 20:30era. Bertan, sushirako arroza eta bere ongarria egiteko trikimailuak emango dira. Parte-hartzaileek Japoniako janari tradizional horren pieza ugari prestatzeko aukera izango dute, makiak, uramakiak, nigiriak, sushia tenpuran eta futomakiak.

Japoniatik, Merkatuko Sukaldaritza Eskolak Thailandiara “egingo du hegan”. Hirugarren ikastaroa Thai sukaldaritzari buruzkoa izango da. Ikastaroa ekainaren 3an, ostiralean, izango da, 18:30ean, eta bertaratzen direnek herrialdeko plater adierazgarriak egiten ikasiko dute, hala nola Pad Thai eta tom yan kung, Thailandiako oso zopa aromatikoa. Hurrengo ikastaroa Pan Bao-arena izango da, ogi leuna eta oso zaporetsua, eta kasu honetan ahate kurruskariz eta pulled porkez beteko da. Ekainaren 29an, asteazkenean, izango da, 18:30ean.

Asian zeharreko bidaiarekin amaitzeko, Bilboko Goi Mailako Ostalaritza Eskolak sukaldaritza asiarra maite duten guztiei euren ezagutzak zabaltzeko aukera eman gura izan die sukaldaritza japoniarrari buruzko ikastaro osoagoarekin. Kasu honetan, guztira 2 orduko lau klase izango dira, eta horietan hauek prestatzen ikasiko da: gyozak eta atun gorriaren tartarra, udoia oilaskoarekin eta miso zopa, kimuchi yakimeshi arroza eta yakisoba eta tonkatsu txerria eta teriyaki atuna.

Erriberako Merkatua emanaldi artistiko baten lekuko izango da berriro datorren larunbatean, maiatzak 7. Txurdinagako Kirikiño Abesbatzak eta Hendaiako abesbatzak kalejira egingo dute 12:30ean Alde Zaharreko kaleetan zehar.

“Plazerra da horrelako jarduera artistikoetan parte hartu ahal izatea, eta ohorea da musika-taldeek gure merkatuetako batean pentsatzea euren jarduerak egiteko”, azaldu du Yolanda Díez Bilboko Udaleko Alkateorde eta Osasun eta Kontsumo Saileko Zinegotziak.

Ekitaldi horretan abesbatzetako 50 kide inguruk hartuko dute parte eta Hendaiako abesbatzarekin egiten duten truke baten parte da.

Maiatzean zehar, Erriberako Merkatuko Sukaldaritza Eskolak errezeta tradizionalak eta teknika moderno eta abangoardistak konbinatuko dituzten sukaldaritza ikastaroak hartuko ditu. Ikastaro horiei esker, ikasleek betiko errezetei ukitu berezia ematen ikasiko dute, baita betiko zaporeei zertzelada desberdina jartzen ere.

“Sukaldaritza tradizionala gure parte da eta, horregatik, gure merkatuetako produktuen zapore tradizionala eta kalitatezkoa teknika eta osagai abangoardistenekin konbinatu ahal izatea, gure esentzia alde batera utzi gabe berritzeko modu egokia iruditzen zait”, azaldu du Yolanda Díez Bilboko Udaleko Alkateorde eta Osasun eta Kontsumo Zinegotziak.

Hilabete honetan zehar lau ikastaro emango dira guztira, bakoitza bi ordukoa. Lehenengoa maiatzaren 12an izango da, eta masail tradizional batzuk egingo dira, ondoren, ukitu moderno, espezializatu eta bidaiaria emanez, eraldatzeko, Bilboko Ostalaritza Goi Eskolako irakasleek erakutsiko dituzten trikimailuei esker.

Hurrengo tailerra maiatzaren 19an, ostegunean, izango da. Egun horretan, saltsak izango dira protagonista merkatuko sutegietan. Bi ordu horietan zehar hiru saltsa egiten ikasiko da: bizkaitar klasikoa, saltsa beltza eta saltsa amerikarra. Sukaldaritza tradizionaleko hirugarren tailerra itsasoko errezetetan oinarrituko da, eta zehatzago, alde batetik txipiroiak tipularekin eta bestetik txipiroi lurrarekin eta erremolatxarekin salteatutako sepia platera.

Kroketak ezinbesteko platera izan dira beti sukalde tradizionaletan; horregatik, maiatzaren 31n, jaki kurruskatsu eta krematsu horren bi errezeta berri iritsiko dira merkatuko sukaldera. Tailer horretan, bi errezeta zoragarri egiten ikasiko da, alde batetik urdaiazpiko kroketa tradizionala, kurruskatsuagoa den “PANKO” ogi birrindu japoniarrarekin egindako errebozatuarekin. Bigarrenik, gure lurrari omenaldia: bexamel eta Idiazabal gaztaz osatutako esfera gozoa, gure basoetako fruitu lehorrez betetako kurruskari batez estalia.

Ikastaroak:

• Osteguna, maiatzak 12: Masailak: tradizioa eta fusioa
• Osteguna, maiatzak 19: Saltsa tradizionalak
• Osteguna, maiatzak 26: Itsasoko errezetak: txipiroiak eta sepia
• Asteartea maiatzak 31: Aho zabalik uzteko kroketak

Ikastaroei buruzko informazio gehiago