Asiako gastronomia maite dutenek ikastaro eskaintza zabala izango dute maiatzean Erriberako Merkatuko sukaldaritza eskolan.

Oraingo honetan, sukaldea Vietnamgo sukaldaritzako errezetekin beteko da (maiatzaren 23an), baina baita Asiako arroz-platerekin (maiatzaren 30ean) eta sushiarekin (maiatzaren 14an eta 21ean) ere. Horrez gain, sukaldaritza indiarrari buruzko ikastaro bat ere eskainiko da (maiatzak 28), non bi plater tipiko prestatuko diren: Oilasko Curry-a eta Meen Varuthathu.

Halaber, sukaldean hasi nahi dutenek formakuntza ziklo bat izango dute astearte arratsaldeetan (5, 12, 19 eta 26), sukaldeetan aldea markatuko duten teknika eta trikimailu berriak ikasteko.

Iaz, osasuneko desberdintasun-egoeran zeuden 900 pertsonak parte hartu zuten tailer horietan.

Programa doakoa da eta ikuspegi teoriko-praktikoa dauka; 2025ean 29 kolektibotako erabiltzaileentzat izan zen eta aurten ere kopuru bera aurreikusten da.

Tailerrak Erriberako Merkatuan egiten dira, eta udal-esparru horretan eskaintzen diren hurbileko produktuak erabiltzen dira.

Bilboko Udaleko Osasun eta Kontsumo Sailak, Bilbao Zerbitzuak elkartearen laguntza eta lankidetzarekin, Elikadura Osasungarriari buruzko Tailerrak antolatu ditu osasun-arloko desberdintasun-egoeran dauden pertsonentzat. Tailer horietan 1.200 plaza egongo dira. 2025eko edizioan, 900 pertsona inguruk parte hartu zuten tailer horietan. Programaren erabiltzaileek berriz ere oso balorazio ona eman diote programari, gutxieneko nota 4,5 izanik, 0tik 5 puntura bitarteko eskalan.

Azken edizio honi dagokionez, Álvaro Pérez Osasun eta Kontsumoko zinegotziak azpimarratu duenez, «programa aurreikusitakoaren arabera garatu da, eta hiriko elkarte gehiagotara iristea lortu dugu. Erakunde horiek egoera ahulean dauden kolektibo askoren bizitza hobetzeko lan egiten dute, haien lana funtsezkoa da, eta Udaletik ahal den guztian laguntzen jarraituko dugu».

2025ean 29 kolektibok parte hartu zuten tailerretan: zaurgarritasun fisikoa edo kognitiboa duten pertsonak biltzen dituzten 11 elkarte, gizarte-zaurgarritasuna duten pertsonekin esku hartzen duten 15 erakunde eta komunitatetik osasuna sustatzeko 3 programa (osasun-sare bat dute).

Elikadura osasungarria hurbileko produktuekin

Elikadura Osasungarriari buruzko Tailerren udal-programaren barruan tailer teorikoak eta praktikoak ematen dira, dohainik, osasun-arloko desberdintasun-egoeran dauden pertsonen elikadura egokitzeko helburuarekin, Bilboko udal-merkatuek eskaintzen duten hurbileko produktua baliatuz. Programa hori 2022an jarri zuen abian Osasun eta Kontsumo Sailak, Bilbao Zerbitzuak-en laguntzarekin.

Osasun-arloko desberdintasunak dituzten pertsona heldu zaurgarriei zuzenduta daude tailerrak. Bilboko Udaleko Osasun eta Kontsumo Saileko langile espezializatuek prestakuntza teorikoa ematen dute, eta praktikak, berriz, Erriberako Merkatuko Sukaldaritza Eskolan egiten dira, ESHBIko profesionalen eskutik.

Bilbao Zerbitzuak, osasun-aliatua bere udal-merkatuetatik

Tailerren seigarren edizioa 2026ko urtarrilean hasi zen, eta Bilbao Zerbitzuak erakundearen lankidetza du, gehienez ere 12 lagunentzako 100 ikastaro (1.200 onuradun) kontratatzea finantzatu baitu. Erriberako Merkatuko Sukaldaritza Eskolan emango dira tailerrok, Bilboko Ostalaritza Goi Eskolako (ESHBI) profesionalen eskutik. Eskola horrek hitzarmen bidez kudeatzen du Erriberako Merkatuan kokatutako Sukaldaritza Eskola.

Lankidetza horren bidez, Bilbao Zerbitzuak aurrera doa Erriberako Merkatua sustatzeko plana lortzeko bidean; izan ere, ikastaro horien bidez, merkatua ezagutzen ez duten edo han erostera ohituta ez dauden pertsonek bertako instalazioak ezagut ditzaten eta merkatu horretan produktu fresko eta osasungarriak eros ditzaketela kontura daitezen lortu nahi da.

Ildo horretan, Álvaro Pérez Alonso Osasun eta Kontsumo Saileko zinegotziak erakundeen arteko lanaren garrantzia azpimarratu du. «Elikadura Osasungarriari buruzko Tailer hauen helburua arlo horretan desberdintasun-egoeran daudenen artean osasuna ehuntzea da. Bilbao Zerbitzuak erakundearen inplikazioa, gure udal-merkatu guztien buru baita, ezinbestekoa da hori posible egiteko. Harro egotekoa da Erriberako Merkatua osasuna, gastronomia eta jasangarritasuna bateratzen dituen espazio bihurtu dela egiaztatzea» adierazi du zinegotziak.

Erriberako Merkatuko Sukaldaritza Eskola apirilean itzuliko da gastronomiaz gozatzeko, ikasteko eta dastatzeko pentsatutako proposamenekin, sukaldean hasten diren pertsonei zein teknikak hobetu nahi dituztenei zuzendutako tailerrekin.

Proposamenen artean, munduko sukaldeen tailerrak nabarmentzen dira, hala nola Thai sukaldaritza tailerra, apirilaren 30ean egingo dena, 18:30etik aurrera. Era berean, sasoiko produktuei ahalik eta etekinik handiena atera nahi dutenek tailer bat izango dute apirilaren 8, 15 eta 20an, tokiko eta udaberriko produktuetan oinarritua (18:30).

Tartar bat zerotik egiten ikasteko aukera ere egongo da. Oraingoan, bertaratzen direnek izokin tartar bat egingo dute kimchiarekin eta mangoarekin, eta Steak tartarra txahalarekin eta tuetanoarekin. Prestakuntza hilaren 17an izango da, 18:30etik aurrera.

Azkenik, garagardoak uztartzen hasi nahi dutenek ere ikastaro bat izango dute apirilaren 24an, 18:30ean.

Erriberako Merkatuko sukaldaritza eskolak produktu fresko eta sasoikoak landuko ditu apirilean zehar “Sasoiko sukaldaritza: udaberria” ikastaroarekin.

Gauzak horrela, apirileko hiru arratsaldetan (8, 15 eta 22, 18:30ean) bertaratzen direnek zaporez betetako errezetak prestatuko dituzte, teknika berriak ikasiko dituzte eta beren sukaldeetan aldea markatuko duten trikimailu txikiak bereganatuko dituzte. Izan ere, sasoiko barazkiez gain (zainzuriak, orburuak edo babak, adibidez), parte-hartzaileak arrainen munduan ere murgilduko dira berdelarekin, antxoekin eta atunarekin, besteak beste.

Halaber, hilabete honetan bao ogiaren munduan (apirilaren 10ean) edota tartarenean murgiltzeko aukera egongo da ere, izokina eta atuna protagonista izango diren errezetekin (apirilaren 17an). Bi formakuntzak 18:30etik aurrera izango dira.

2025eko Bilboko Merkataritza Plan Estrategikoaren (PECB2025) esparruan, Bilbao Zerbitzuak-ek oso balantze positiboarekin amaitu du 2020-2025 aldia; udal merkatuak modernizatzeko, instalazioen efizientzia energetikoa hobetzeko eta hiriko merkataritza jarduera hirian indartzeko bideratutako ekimenekin.

Izan ere, Erriberako Merkatuan garatutako esku hartzeen artean daude hotz industrialeko sistema berri bat, eguzki instalazio fotovoltaiko bat eta bateria sistema bat abian jarri izana, bai eta denbora errealean energia monitorizatzeko sistema bat ere. “Hobekuntza guzti hauez gain, irisgarritasunean aurrerapenak eman dira ere, igogailuekin, eskailera mekanikoekin eta karga-jasogailuekin. Horrez gain, wifi sarearen bidez konektibitate digitala hobetzea lortu da, BATUZ sistemaren eskakizunak betetzea erraztuz eta erosketa esperientzia hobetuz”, azpimarratu du Álvaro Pérez Bilboko Udaleko Osasun eta Kontsumo zinegotziak.

Era berean, Bilbao Zerbitzuak-ek 2021ean egindako Bilboko Hornidura Merkatuen Udal Sarearen Gida Eskema ere bultzatu du gainerako udal merkatuetan. Hala, 2023an eta 2024an energia kostuak murriztera bideratutako ekimenak jarri ziren martxan Zabalguneko eta Otxarkoagako merkatuetan, non eguzki panelak instalatu ziren, kontsumo elektrikoan eta emisioetan murrizketa esanguratsuak lortuz; eraikinen erabilera baldintzetan hobekuntza osagarriak egiteaz gain. “Alde Zaharreko esku-hartze berezien artean, Erriberako Merkatua bultzatzeaz eta modernizatzeaz gain, ingurune historikoan merkataritza-jarduera indartzeko beste proiektu batzuk ere bideratu ditugu”, gehitu du zinegotziak.

Merkatuak, komunitate-espazioak

Sustapenaren arloan, 2022tik 2025era bitartean, Bilbao Zerbitzuak-ek hainbat ekimen ere garatu ditu merkatuek komunitatean, kontsumo arduratsuan eta elikadura osasungarrian duten zeregina indartzeko. Izan ere, iaz “Merkati” kanpaina abiarazi zen, merkatuen ikur bisual berri gisa, helburu argi batekin: belaunaldi berriekin konektatzea, merkatuen pertzepzioa modernizatzea eta Bilboko identitatean funtsezko espazio gisa duten zeregina indartzea.

Era berean, Bilbao Zerbitzuak lankidetza estuan aritu da Bilboko Udaleko Osasun eta Kontsumo arloarekin elikadura osasungarriko tailer eta programetan, bereziki kolektibo kalteberei zuzenduta egon direnetan.

“Gure apustua argia zen: udal merkatu modernoagoak, jasangarriagoak, irisgarriagoak eta ingurunearekin konektatuagoak finkatzea, hiri bizitzako funtsezko elementu gisa eta tokiko ekonomiaren motor gisa duten zeregina indartuz”, nabarmendu du Perezek.

Entitateak ildo horretan lan egiten jarraituko du 2030erako Merkataritza Plan Estrategikoaren esparruan, Bilboko merkatu sarea eta hurbileko merkataritzari egiten dion ekarpena hobetzen jarraitzeko.

Duela egun batzuk, Bilboko udal-merkatuek beste urrats bat eman zuten merkatuaren esperientzia sare sozialetara eramaten, publiko berriei irekitzeko helburuarekin. Ekimena, merkatuen posizionamendu kanpainaren barruan kokatua, tokiko hainbat preskriptore digital bildu zituen, eta, aldi berean, hedabide batzuen interesa piztu zuen ere. Izan ere, showcooking horrekin, Bilbao Zerbitzuak-ek modu desberdinean erakutsi nahi izan zuen Erriberako Merkatua, “barruan gordetzen dituen produktu freskoak, hurbilekoak eta kalitatekoak ikus, senti, ezagutu eta balora ditzaten”, goraipatu zuen Alvaro Perez Osasun eta Kontsumo zinegotziak.

Aurreikusita zegoen bezala, topaketa goizeko lehen orduan hasi zen Erriberako Merkatuaren bisitarekin, Adrián Rejón MasterChef Españako lehiakide ohi eta sukaldari Otxarkoagarraren eskutik gainera. Eduki sortzaileek, @bilbaofoodsafari, @rincon.foodie, @bilbofodie, @notodoesgula, @gourmetbilbao, @tragaldabis eta @janitxu, sukaldari bolbotarrarekin batera merkatuko hainbat postuetan ibili ziren; eta merkatariak ezagutzeko eta menua egiteko erabiliko zituzten produktu freskoak eta sasoikoak aukeratzeko aukera izan zuten ere.

Merkatarien gomendioei jarraituz, betetzen ari ziren erosketa-poltsen eta une oro grabatzen ari ziren mugikorren artean, taldeak bere komunitateekin partekatu zuen postuetan zuzenean erosteko esperientzia, merkatuko giroa eta jarduera barrutik erakutsiz. Testuinguru horretan, Nora Abete alkateordeak ekitaldiaren beharra nabarmentzeko aprobetxatu zuen: “tokiko merkataritzan erostearen garrantzia ikusi ahal izateko, eta baita udal merkatuak gazteenei hurbiltzeko ere”.

Behin erosketa eginda, jarduerak ESHBIko sukaldeetan jarraitu zuen. Ordubetera, denak mantala jantzita eta janaria prestatzeko prest, Adrian Rejónen esanetara, taldea bikoteka antolatu zen erositako produktuetan oinarritutako menua prestatzen hasteko: legatza saltsa berde zitrikoan, barazki- eta gazta-tosta eta, azken ukitu gisa, mango espeziarekin.

Saioa giro parte hartzailean gauzatu zen, eta urrats bakoitza – osagaiak prestatzetik azken platerera arte – sare sozialetatik zabaldu zen, milaka jarraitzaileri merkatuan erosten eta produktu freskoekin sukaldatzeko esperientzia osoa helaraziz.

Ekimen hauekin, Bilbao Zerbitzuak udal merkatuak publiko berrietara hurbiltzea eta kanal digitaletan duen presentzia indartzea ere du helburu. Gonbidatutako preskriptoreen parte-hartzeari esker, merkatuek beren profiletan lekua bat izan zuten, euren komunitateetara helduz, eta produktu freskoan, hurbileko merkataritzan eta auzoko bizitzan oinarritutako kontsumitzeko modu bati balioa emanez.

• Bilbao Zerbitzuak erakundeak tokiko kontsumoaren erakusleiho digital bihurtu du Erriberako merkatua.
• Eduki gastronomikoko zazpi sortzailek merkatuan egindako erosketa- eta sukaldaritza-esperientzia bat partekatuko dute beren komunitateekin.
• Ekintza bihar egingo da Adrián Rejón Bilboko sukaldariak gidatuta, eta Bilbao Zerbitzuak erakundeak bultzatutako posizionamendu-kanpainaren bigarren fasearen parte da.
• Deialdia irekita dago ekintzaren berri eman nahi duten komunikabideentzat.

Bihar, martxoak 3, Erriberako merkatua esperientzia gastronomiko eta digitalaren agertoki bihurtuko da, sare sozialen bidez Bilboko udal merkatuak 88.000 pertsona baino gehiagorekin konektatuko duena. Tokiko zazpi preskriptorek parte hartuko dute Bilbao Zerbitzuak erakundeak antolatutako elkarretaratze batean, 2025eko abendutik merkatuak tokiko kontsumorako, auzoko ekonomiarako eta eguneroko bizitzarako espazio modura daukaten zeregina indartzeko bultzatzen duen posizionamendu-kanpainaren barruan.

Hitzordua 9:30ean hasiko da, merkatuan zehar ibilbide bat eginez, MasterChef Españako lehiakide ohia eta Otxarkoagako bizilaguna den Adrián Rejón sukaldari bilbotarrak gidatuta. Harekin batera@bilbaofoodsafari, @rincon.foodie, @bilbofodie, @notodoesgula, @gourmetbilbao, @tragaldabis eta @janitxu izango dira eta postuetatik ibiliko dira, merkatariekin hitz egingo dute eta, denen artean, produktu freskoak eta sasoikoak hautatuko dituzte, gero hiru plater egiteko.

Helburua da merkatuan erosteko benetako esperientzia barrutik erakustea eta esperientzia hori eduki erakargarri eta hurbil bihurtzea belaunaldi berrientzat. Nora Abete eta Álvaro Pérez Bilboko Udaleko zinegotziek ere parte hartuko dute saioan.

10:30ak aldera, jarduera ESHBIk Erriberako merkatuan daukan Eskolara eramango da. Bertan, Adrián Rejónek errezeten lanketa gidatuko du, produktua, sormena eta kontakizun digitala konbinatuko dituen saio batean. Bertan, parte-hartzaileek talde bitan arituko dira.

Ekintza hori Bilbao Zerbitzuak erakundearen kanpainaren bigarren fasearen parte da. Kanpaina horrekin, tokiko kontsumoak, auzoko ekonomiak eta eguneroko bizitzak bat egiten duten espazio modura sendotu nahi dira udal merkatuak. Estrategiak identitate bisuala –»Merkati» ikur ezagugarri gisa–, aurrez aurreko dinamizazioa eta proiekzio digitala konbinatzen ditu, eta, gainera, tokiko hedabideetan eta hiri-euskarrietan publizitatea eginez indartzen da.

Ekimen honen bidez, Bilbao Zerbitzuak erakundeak udal merkatuen irudi berritzailea eta esperientziala proiektatu eta produktu freskoaren, hurbileko tratuaren eta jasangarritasunaren garrantzia azpimarratu nahi du, kanpainaren mezua —«Erosi freskoa. Erosi bertokoa» eta «Igo gurdira!»— publiko berriei kanal digitalen bidez helaraziz.

Elkarretaratze gastronomiko horrekin, udal merkatuak kontsumitzeko modu baten plato, ikasgela eta erakusleiho digital bihurtuko dira ordu batzuetarako, Bilboren nortasunaren parte dena eta etorkizunari bere funtsa galdu gabe begiratzen diona.

Ekintza honen berri eman nahi duten komunikabideek parte-hartzaileekin egon ahal izango dira, bai merkatuko erosketan (9:30), bai ESHBIk Erriberako merkatuan daukan Eskolako sukaldaritza-saioan (10:30).

Erribera Merkatuko Sukaldaritza Eskolak bere prestakuntza-programazioa zabaltzen jarraitzen du, maila gastronomiko guztietarako pentsatutako proposamenekin. Oraingo honetan, martxoan, bi ikastaro berri egingo dira zaleentzat eta oinarrizko sukaldaritzako ezagutzak sendotu nahi dituztenentzat.

Horrela, eta gastronomiaren munduan murgildu nahi dutenentzat, martxoaren 3an, 10ean eta 17an Sukaldaritzan Hasteko ikastaro bat izango da. Bertaratzen diren pertsonek menu oso bat diseinatu eta prestatuko dute, oinarrizko gaitasunak eskuratzeko helburuarekin.

Errezeta-liburu tradizionalean fusioa sartzen hasi nahi duten esperientziadun pertsonek ere hitzordua izango dute datorren martxoaren 24an masailetako ikastaroarekin.

Bi prestakuntza saioak 18:30etik aurrera hasiko dira.

Zalantzarik gabe, Erriberako Merkatua bilbotarrek eta bisitariek gehien bisitatzen duten hiribilduko kokaguneetako bat da oraindik ere. Zifrei begiratu besterik ez dago, iaz 2.359.225 sarrera izan baitzituen merkatuak, hilean 196.602 batez besteko bisitarekin. “Azken urteetako zifrarik onena da, eta horrek adierazten du bide onetik goazela bisitariak eta erabiltzaileak berreskuratzeari dagokionez”, adierazi du Bilboko Udaleko Osasun eta Kontsumo Arloko zinegotzi ordezkari Álvaro Pérez Alonsok.

Ildo horretan, azpimarratzekoa da uztaila eta abuztua bisitari gehien izan zituzten hilabeteak izan zirela. Aldiz, sarrera gutxien izan zituzten hilabeteak urtarrila eta otsaila izan ziren. Hala ere, merkatura sarrera gehien izan dituzten 2025eko egunak, bisita-kopuruaren arabera, honako hauek izan ziren: apirilaren 19a (13.381), abenduaren 30a (13.152), maiatzaren 2a (12.902), urriaren 1a (12.442) eta azaroaren 8a (12.075).

Merkaturako sarbideei dagokienez, Erribera kalea sarrera nagusia jarraitzen du izaten, egindako bisiten % 50,54 hartzen. Halaber, Merced-eko sarreraren bidez, pertsonen % 33,15 sartu ziren, eta % 16,31k San Antongo atea erabili zuten.

Azkenik, merkatura sartzeko ordutegiari dagokionez, astegunetan eta goizeko ordutegian, jendetzarik handiena 11etatik 13etara egon zen, eta handiena 12etan izan zen, herritarrek edo turistek merkatua bisitatzen duten ordua izaten delako. Arratsaldeko ordutegian, jendetzarik handiena 17etatik 19etara egon zen, eta handiena 18etan. Larunbatetan, jendetzarik handiena 11etatik 13etara egon zen.

Gabon hauetan, Erriberako Merkatuko Sukaldaritza Eskolako ikastaro berriekin dibertsioa eta ikaskuntza oparitu daitezke. Horrela, eta egun berezi hauetan aho zabalik utziko dituzten errezetak ikasi nahi dutenek, urtarrilaren 13, 20 eta 27an, 18:30ean, eskolak emango duen neguko sukaldaritza prestakuntza oparitu edo bertaratu ahal izango dute.

Nolanahi ere, eskolak dagoeneko 2026ko prestakuntza eskaintza publiko egin du, eta sukaldaritza tradizionalari, eta tokiko eta KM 0-ko produktuei eta munduko errezetei balioa emango dieten ikastaro ugari biltzen ditu.