Osasun eta Kontsumo Sailak bultzatutako programaren helburua elikadura-ohiturak hobetzen eta horren inguruko ezagutza gehiago izaten laguntzea da, elikadura osasungarriari, jasangarriari eta aurrekontu egokia duenari buruzko kezkak eta soluzio praktikoak partekatzeko.

Saio teorikoak San Frantziskoko Udal Zentroan emango dira, Saileko langile espezializatuekin, eta praktikak Erriberako Merkatuko Sukaldaritza Eskolan, Bilboko Ostalaritza Goi Eskolako (ESHBI) profesionalen eskutik.

“Elikadura Osasungarriari buruzko Tailerrak”, ALCER Bizkaia elkartearekin lankidetzan, giltzurrunetako gaixotasuna duten pertsonei ere egongo dira zuzenduta. Gaixotasun horrek herritar guztien % 10ean du eragina, eta 65 urtetik gorakoen % 25ean.

Programak tokiko eta sasoiko elikagaien kontsumoa sustatzen du hiribildua hornitzen duten udal-merkatuetako saltokietan.

Yolanda Díez Bilboko Alkateorde eta Udaleko Osasun eta Kontsumoko Zinegotzi Ordezkariak “Elikadura Osasungarriari Buruzko Tailerrak” aurkeztu ditu gaur goizean Erriberako Merkatuko Sukaldaritza Eskolan. Tailer teorikoz eta praktikoz osatutako programa da, eta bere helburua osasun-arloko desberdintasun-egoeran dauden pertsonen elikadura egokitzea da, gainera, Bilboko udal-merkatuek eskaintzen duten gertuko produktua aprobetxatuz. Ekitaldian Belen Herrera ALCER Bizkaia Elkarteko presidentea izan da, hilean behin saioak giltzurrunetako gaixotasuna duten pertsonei zuzenduta egongo direlako.

“Programa beharrezkoa zen. Batez ere, osasun-arloko desberdintasun-egoeran dauden pertsonen artean. Eta hori gauzatzeko modurik onena Erriberako Merkatuko Sukaldaritza Eskolan tailer praktikoak emango dituzten Bilboko Ostalaritza Goi Eskolako (ESHBI) profesionalen saioak dira, profesional horien esku jarriz Bilbao Zerbitzuak erakundearen eskutik gure udal merkatuek egunero eskaintzen dizkiguten gertuko produktuen aukera”, azaldu du Yolanda Diezek.

Espazio horren helburua zaurgarritasun- eta osasun-arloko desberdintasun-egoeran dauden bilbotarren elikadura-ohiturak eta nutrizioari buruzko oinarrizko ezagutzak hobetzen laguntzea da, elikadura osasungarri eta jasangarriagoari aurrekontu egokiarekin aurre egiteko moduari buruzko kezkak partekatzeko eta soluzio praktikoak sortzeko.

“Elikadura osasungarriari buruzko tailerrak” – “Osasuna ehuntzen”

“Elikadura osasungarriari buruzko tailerrak”, San Frantzisko eta Bilbo Zaharra auzoetako “Osasuna Ehuntzen” komunitate-partaidetza prozesuko jardueretako bat da. Prozesu hori osasuna sustatzeko sortu zen, auzoa ekintza-unitate moduan erabiliz. Iazko abenduan egindako jardunaldi batean, Tokiko “Osasuna Ehuntzen” Sareak elikadura osasungarriari buruzko tailer teoriko-praktikoa proposatu zuen.

Horregatik, lehenengo fase honetan, Bilboko Udaleko Osasun eta Kontsumo Sailak, auzoan bizi diren helduei zuzentzen dizkie tailerrak, osasun-arloko desberdintasunak dituzten pertsonei lehentasuna emanez.

Saioak

• Lehen tailerra: apirilak 28 (saio teorikoa), maiatzak 4, 12 eta 19 (sukaldaritza)
• Bigarren tailerra: maiatzak 26 (saio teorikoa), ekainak 2, 9 eta 16 (sukaldaritza)
• Hirugarren tailerra: urriak 6 (saio teorikoa), urriak 13, 20 eta 27 (sukaldaritza)
• Laugarren tailerra: azaroak 3 (saio teorikoa), azaroak 10, 17 eta 24 (sukaldaritza)

Giltzurrunetako gaixotasuna duten pertsonei zuzendutako “Elikadura osasungarriari buruzko tailerra”

Gainera, hilean behin, “Elikadura Osasungarriari Buruzko Tailer” batzuk giltzurrunetako gaixotasuna duten pertsonei egongo dira zuzenduta. Gaixotasun horrek herritar guztien % 10ean du eragina, eta 65 urtetik gorakoen % 25ean.

ALCER Bizkaia Elkarteak 45 urte daramatza osasuna sustatzeko proiektuak gauzatzen. Elkartearen lana beti egon da bizi-ohitura osasungarriak eskuratzeari lotuta, giltzurrunen narriadura prebenitzeko. Erakundeak nutrizio-aholkularitzako zerbitzua du. Zerbitzu horretatik, euren elikadura gaixotasunaren faseko behar espezifikoetara egokitzeko aukera ematen dien jarraibide dietetikoak eskaintzen zaizkie pazienteei.

Tailer horiek kontsultan azaltzen diren jarraibide dietetiko eta tresna guztiak praktikan jartzeko beste aukera bat dira, bai aurredialisian, bai dialisian eta transplantatuta dauden pazienteentzat” adierazi du Yolanda Díezek. “Nutrizioa da honi eta patologia guztiei aurre egiteko giltzarrietako bat, eta funtsezkoa da paziente bakoitzaren gaixotasunaren fasearen araberako elikadurari eustea”, amaitu du.

Saioak: Apirilak 26, Maiatzak 18, Ekainak 14, Irailak 14, Urriak 18, Azaroak 23 eta Abenduak 13

Martxotik aurrera eta sei hilabete inguruz, Erriberako Merkatuak obrak egingo ditu gaur egun duen hotz-sistema ordezkatzeko. Instalazioaren ordezkapena jasangarritasuneko eta ingurumen-hobekuntzako neurria da, eta, neurri handian, hotz industrialeko egungo instalazioaren zaharkitze teknikoak eragin du.

Gaur egungo ekipoak, eragiketa eta mantentze kostu handiak izateaz gain, ez dira oso eraginkorrak, atmosferan eragin kaltegarria duten hozte-gasen erabileran oinarritzen direlako, eta, gainera, gas-horniduraren gehiegizko gastua eragiten dute, instalazioaren karbono-aztarna handituz. “Instalatuko den hotz-sistema berriak eragin handia izango du ingurumenaren hobekuntzan eta karbono-aztarna txikiagoan; izan ere, hodietan hozgarria kargatuz egiten den hoztearen ordez ura erabiliko da. Alternatiba horrek ingurumena gehiago errespetatzen du eta eraginkorragoa da”, Yolanda Díez Bilboko Udaleko Osasun eta Kontsumo zinegotziak azaldu duenez.

Zehazki, Erriberako Merkatuko hotz industrial sistemaren ordezkapena Bilboko Udalaren 2019-2023 Aginte Planeko “1. jarduketa-ildoa, Jarduera ekonomikoa eta enplegua” izenekoaren barruan dago; zehatzago, “1.8 Jarduera. Alde Zaharraren garapena merkataritza-, kultura- eta bizikidetza-gune gisa” izenekoaren barruan.

Erriberako Merkatuko Sukaldaritza Eskolak gozogintzako ikastaro bat hartuko du martxoan, hilaren 9, 16, 23 eta 30ean, 18:30ean. Lau arratsalde horietan, Bilboko Ostalaritza Goi Eskolako profesionalek ikastaroa emango dute, eta ahosabairik zorrotzena ere konkistatuko duten zazpi errezeta prestatuko dituzte guztira.

Brownieak, Tatin tarta edo piku biscuit gozoak dira prestatuko diren elaborazioetako batzuk. Errezeta horiek konplikatuak eta eskarmenturik gabeko norbaitentzat egiten zailak diruditen arren, senideak eta lagunak ezustean harrapatzea eta sukaldaritzako benetako profesional gisa geraraztea lortuko dute.

Yolanda Díez Bilboko Udaleko Osasun eta Kontsumo Saileko zinegotziak parte hartzeko deia egin du. “Gure aisialdia ikasteko eta, aldi berean, entretenitzeko erabiltzea ere osasuna da”.

Otsailean zehar, Erriberako Merkatuko bigarren solairuan dagoen Sukaldaritza Eskolak gustu eta ahosabai guztietara egokitutako sukaldaritza ikastaroak eskainiko ditu. Otsailaren 9tik aurrera eta hurrengo hiru asteazkenetan, okela maite dutenek zortea izango dute, Bilboko Ostalaritza Goi Eskolak bere haragi ikastaroa emango baitu.

3 eguneko ikastaro honetan 6 errezeta prestatuko dira haragi gorriekin, haragi zuriekin eta hegaztiekin. Prestatuko diren plateren artean hauek egongo dira, besteak beste: oilasko-terrina pepitoria eran perretxiko, arto eta almendra-kremarekin, ahatea laranja erara mango-chutneyarekin eta galeper-tinbala eskabetxean.

Bestalde, Inauteri garaia datorrela aprobetxatuz, otsailaren 24an, ostegunean, ospakizun horren ezaugarri diren tostadak eta torrijak egiten ikasteko ikastaroa emango da.

Horrez gain, tako mexikarrak eta pasta freskoa egiten ikasteko sukaldaritza-ikastaroak emango dira eta, gainera, sukaldaritza jasangarriari buruzko ikastaroa ere eskainiko da.

Kontsultatu ikastaro guztiak

Irratiaren Egunaren bezperetan, Euskadi Irratiko programa “Faktoria Magazine” saioa Erriberako Merkatutik iritsiko da entzule guztiengana. Manu Etxezortuk gidatutako irratsaioak zuzeneko musika, Imanol Ituñoren magia eta Idoia Torregarairen umorea izango ditu. Goizeko 10:00etatik 13:00etara emango da zuzenean ataritik, eta hizpide izango dituen gaien artean Zazpi Kaleetako ekonomia eta kultur giroa egongo dira.

Gainera, merkatuko postu guztiak ezagutuko ditugu, baita horietan lan egiten duten pertsonak ere. Merkatuko beste elementu erakargarrietako bat Sukaldaritza Eskola da. Bertan, ikasleen laguntzarekin, “Faktoria” pintxoa egingo dute.

Zatoz Erriberako Merkatura ostiral honetan, otsailak 11, eta baliteke astebeteko doako erosketekin irtetea, zozketatuko diren 150 euroei esker.

Bilboko Erribera kalea eta izen bereko udal Merkatua izango dira Marta Medina kazetariak aurkezten duen TVEko “España Directo” saioaren atal berriko protagonistak.

Saio horretan, Estatuko kalerik enblematikoenak erakusten dira eta ezin zen Erribera kalea falta. Saioak hiriaren historia eta tradizioa erakutsiko dizkie ikus-entzuleei, baita Merkatuko postuetako langileak zein goiz jaikitzen diren eta egunean zehar bertan izaten den atzera-aurrera guztia ere. Otsailaren 10eko goizean, saioak grabazioak egingo ditu Erribera inguruan, kalearen eta udal merkatuaren esentzia guztia bereganatuz.

Ostiral honetan, otsailaren 4an, Bilbao Musikako Ahotsak abesbatzak eta Aranbarri AkordeON akordeoi taldeak Santa Agedaren bi abesti joko dituzte Erriberako Merkatuan, azokaren atarian, 19:30etik 20:30era. “Polita izateaz gain, geurea ere bada, eta horrelako tradizioei eusten lagundu behar da. Eta musikarekin zerikusia badute, are hobeto”, azaldu du Yolanda Díez Bilboko Udaleko Osasun eta Kontsumo zinegotziak.

Bilbao Musikako Ahotsak abesbatza Bilboko Musika Eskolako ikasleek osatutako helduen abesbatza da. 70 kidek osatzen dute eta, Miren Bernaolaren zuzendaritzapean, abesbatzen topaketak egiten dituzte Galdakaoko, Sestaoko eta Amurrioko Musika Eskoletako abesbatzekin, besteak beste.

Aranbarri AkordeON da ostiral honetan Santa Ageda abestiak joko dituen Bilbao Musikako beste taldeetako bat. Bilboko Musika Eskolako ikasleek osatzen dute eta 20 urte baino gehiagoko ibilbidea du. Garbiñe Velascok zuzentzen duen taldearen errepertorioan, Astor Piazzolla, Renato Bui, Fermin Gurbindo, Celino Bratti eta Richard Galiano konpositoreen lan klasikoen eta akordeoirako jatorrizko lanen transkripzioak tartekatzen dira.

Urte historiko bati amaiera emateko, Mercabilbaok amantala lotu du, suak piztu ditu eta lanari ekin dio “50 urte, 50 errezeta” liburu solidarioa eginez, mende erdia Bizkaiko gastronomiaren zapore onenekin ospatzeko. Bilboko eta Bizkaiko jatetxeetako sukaldariek eta Bilboko, Galdakaoko eta Leioako Ostalaritza Eskoletako sukaldariek egindako 50 sukaldaritza proposamenen sorta da. Errezeten artean, hasierakoak, arrain-, itsaski- eta haragi-plater nagusiak eta postreak biltzen dira.

Errezeta liburua gaur goizean aurkeztu dute Bilboko Erriberako Merkatuan Xabier Ochandiano Bilboko Udaleko Garapen Ekonomiko, Merkataritza eta Enplegu zinegotziak, Yolanda Díez Bilboko Udaleko Osasun eta Kontsumo zinegotziak eta Aitor Argote Ibánez Mercabilbaoko zuzendari nagusiak, Miguel Ángel Fernandino Bizkaiko Elikagaien Bankuko presidenteak, Rafael Gardeazabal Bilbao Dendak-eko presidenteak, Bizkaidendak-eko presidenteak, eta Andres Cebrecos-ek, liburuan parte hartu duten zenbait sukaldarik lagunduta.

Agustin Herranz kazetari ezagunak gidatzen duen Herri Irratiko “Asuntos Exteriores” irratsaioaren set-a bihurtu da gaur goizean Erriberako Merkatua. Saioa zuzenean eman dute, eta hainbat elkarrizketa egin dituzte, besteak beste, Yolanda Diez Bilboko Udaleko Osasun eta Kontsumo zinegotziari.

Bilboko udal-merkatuek pizten duten interes mediatikoaren beste erakusgarri bat da; izan ere, gero eta maizago bihurtzen dira bat-bateko telebista-plato, irrati-set, elkarrizketa-topagune… azken batean, merkataritza-topagune, gizarte-topagune, aisialdi-gune… eta bizitza-gune horietan interesa duten komunikabideen erakargarri.

• Garai tradizionaletan ere ohitura onak bultzatzea eta kolektiboaren irudia indartzea dira Bilboko Udaleko Osasun eta Kontsumo Sailak sustatuta egin den “Km0, Kalitatea, Zerbitzua, Salud” izeneko kanpainaren helburuak.
• Dendarien artean mantalak banatuko dira, eta bezeroen artean poltsa berrerabilgarriak, Erribera, Zabalgune, Deustu, San Ignazio, Labayru, Otxarkoaga eta Traukoko udal merkatuekiko fideltasun eta konfiantzaren sari gisa.
• Yolanda Diez Osasun eta Kontsumoko zinegotziaren esanetan, kanpainaren bidez udal merkatuek kalitatezko merkataritzaren enbaxadore gisa duten garrantzia aitortu nahi da, baita elikadura eta ohitura osasungarriak hedatzeko egiten duten lan eskerga ere.

Yolanda Díez Bilboko Udaleko Osasun eta Kontsumoko zinegotziak Bilboko udal merkatuen Gabonetako kanpainaren xehetasunak aurkeztu ditu gaur goizean Erriberako Merkatuan. Aurten, Bilbon erosketa-saski onena hornitzen duten zazpi udal merkatuek –Erribera, Zabalgunea, Deustu, San Ignazio, Labayru, Otxarkoaga eta Trauko– bat egiten dute 0 kilometroko merkatuaren balioa nabarmentzeko kanpaina honekin, hau da, kalitatezkoa, gertukoa eta prezio onekoa, hori guztia mezu osasuntsua duten Gabon hauen testuinguruan. Hain zuzen ere, kanpainaren leloa “Km0, Kalitatea, Zerbitzua, Salud” da.

Bilboko Udaleko Osasun eta Kontsumoko zinegotziaren hitzetan, “Bilboko udal merkatuek Bilbon kalitatezko merkataritzaren enbaxadore gisa duten irudi kolektiboa indartzea, eta elikadura eta ohitura osasungarriak hedatzeko betetzen duten zeregin garrantzitsua nabarmentzea” dira gaur Erriberan aurkeztu den udal merkatuen Gabonetako kanpainaren helburua. Keinu gisa, mantalak banatu dira merkatarien artean, eta poltsa berrerabilgarriak bezeroen artean, beraien fideltasuna eskertzeko.

Díezek, halaber, udal merkatuen garrantzia zentzu zabalagoan azpimarratu du: “Gure kultura gastronomiko eta sozialaren funtsa osatzen duten ohituren eta tradizioen hedatzaileak dira. Garai tradizionaletan (adibidez, Gabonetan) udal merkatuetan erostea sustatzea da beste helburu bat, bizitzaren etapa guztietan bizitza osasuntsu eta orekatua izateko. Eta, hirugarrenik, eguneroko plastiko-kontsumoa murriztea, silikonazko edo oihalezko poltsekin ordezkatuz. Hartara, poltsa berrerabilgarriak banatzeko ekimen berezia egingo da, erosleen konfiantza saritzeko.

Ildo horretan, Osasun eta Kontsumo Saileko zinegotziak azpimarratu du kanpainaren helburua dela “udal merkatuak hiriko eta auzoetako bizitzaren babesleku gisa sustatzea. Jarduera ekonomikoko guneak dira merkatuak, eta erosketa tradizionalaren eta familiako erosketaren espiritua bizirik mantentzen dute. Kontsumitzaileei produktu fresko eta kalitate handienekoen aukerarik zabalena eskaintzen diete”.