Agustin Herranz kazetari ezagunak gidatzen duen Herri Irratiko “Asuntos Exteriores” irratsaioaren set-a bihurtu da gaur goizean Erriberako Merkatua. Saioa zuzenean eman dute, eta hainbat elkarrizketa egin dituzte, besteak beste, Yolanda Diez Bilboko Udaleko Osasun eta Kontsumo zinegotziari.

Bilboko udal-merkatuek pizten duten interes mediatikoaren beste erakusgarri bat da; izan ere, gero eta maizago bihurtzen dira bat-bateko telebista-plato, irrati-set, elkarrizketa-topagune… azken batean, merkataritza-topagune, gizarte-topagune, aisialdi-gune… eta bizitza-gune horietan interesa duten komunikabideen erakargarri.

• Garai tradizionaletan ere ohitura onak bultzatzea eta kolektiboaren irudia indartzea dira Bilboko Udaleko Osasun eta Kontsumo Sailak sustatuta egin den “Km0, Kalitatea, Zerbitzua, Salud” izeneko kanpainaren helburuak.
• Dendarien artean mantalak banatuko dira, eta bezeroen artean poltsa berrerabilgarriak, Erribera, Zabalgune, Deustu, San Ignazio, Labayru, Otxarkoaga eta Traukoko udal merkatuekiko fideltasun eta konfiantzaren sari gisa.
• Yolanda Diez Osasun eta Kontsumoko zinegotziaren esanetan, kanpainaren bidez udal merkatuek kalitatezko merkataritzaren enbaxadore gisa duten garrantzia aitortu nahi da, baita elikadura eta ohitura osasungarriak hedatzeko egiten duten lan eskerga ere.

Yolanda Díez Bilboko Udaleko Osasun eta Kontsumoko zinegotziak Bilboko udal merkatuen Gabonetako kanpainaren xehetasunak aurkeztu ditu gaur goizean Erriberako Merkatuan. Aurten, Bilbon erosketa-saski onena hornitzen duten zazpi udal merkatuek –Erribera, Zabalgunea, Deustu, San Ignazio, Labayru, Otxarkoaga eta Trauko– bat egiten dute 0 kilometroko merkatuaren balioa nabarmentzeko kanpaina honekin, hau da, kalitatezkoa, gertukoa eta prezio onekoa, hori guztia mezu osasuntsua duten Gabon hauen testuinguruan. Hain zuzen ere, kanpainaren leloa “Km0, Kalitatea, Zerbitzua, Salud” da.

Bilboko Udaleko Osasun eta Kontsumoko zinegotziaren hitzetan, “Bilboko udal merkatuek Bilbon kalitatezko merkataritzaren enbaxadore gisa duten irudi kolektiboa indartzea, eta elikadura eta ohitura osasungarriak hedatzeko betetzen duten zeregin garrantzitsua nabarmentzea” dira gaur Erriberan aurkeztu den udal merkatuen Gabonetako kanpainaren helburua. Keinu gisa, mantalak banatu dira merkatarien artean, eta poltsa berrerabilgarriak bezeroen artean, beraien fideltasuna eskertzeko.

Díezek, halaber, udal merkatuen garrantzia zentzu zabalagoan azpimarratu du: “Gure kultura gastronomiko eta sozialaren funtsa osatzen duten ohituren eta tradizioen hedatzaileak dira. Garai tradizionaletan (adibidez, Gabonetan) udal merkatuetan erostea sustatzea da beste helburu bat, bizitzaren etapa guztietan bizitza osasuntsu eta orekatua izateko. Eta, hirugarrenik, eguneroko plastiko-kontsumoa murriztea, silikonazko edo oihalezko poltsekin ordezkatuz. Hartara, poltsa berrerabilgarriak banatzeko ekimen berezia egingo da, erosleen konfiantza saritzeko.

Ildo horretan, Osasun eta Kontsumo Saileko zinegotziak azpimarratu du kanpainaren helburua dela “udal merkatuak hiriko eta auzoetako bizitzaren babesleku gisa sustatzea. Jarduera ekonomikoko guneak dira merkatuak, eta erosketa tradizionalaren eta familiako erosketaren espiritua bizirik mantentzen dute. Kontsumitzaileei produktu fresko eta kalitate handienekoen aukerarik zabalena eskaintzen diete”.

Asperger eta Autismoaren Espektroko nahasmendua duten pertsonen Familien Prestakuntza eta Aisia Sustatzeko Elkarteak Erriberako Merkatua bisitatuko du larunbat honetan, abenduaren 18an. Bilbao Zerbitzuakek, merkatuko merkatarien elkarteak eta Star Wars unibertsoko figurante homologatuen Legión 501 taldeak ere hartuko dute parte.

Ekitaldian zehar, photocall bat jarriko da atarian, eta bertan Star Warseko figuranteek argazkiak aterako dituzte umeekin eta senideekin batera. Photocall-az gain, ekitaldian zehar, pertsonaia batzuek merkatuko postuak bisitatuko dituzte animazioa sortzeko eta, aldi berean, Bilbao Zerbitzuakek udal merkatuei dagokienez egiten duen lana bistaratzeko.

Photocall-aren albo batean, aprendeTEAko zenbait kidek Autismoari eta Asperger-ari buruzko informazioa ematen arituko dira, eta, horrela, dauden mitoei buruzko benetako informazioa transmititzea eta bertaratzen direnak nahasmendu horiek dituzten pertsonen aurrean sentsibilizatzea lortuko dute.

Ekitaldia 11:30ean hasiko da eta bi ordu inguruko iraupena izango du.

Albia Taldeak, ehorzketa-sektoreko erreferentziazko enpresak, gizartea sentsibilizatzeko ekintza egin du gaur goizean Erriberako Merkatuan. Konpainiak kotoi birziklatuarekin egindako oihalezko 2.000 poltsa baino gehiago banatu ditu jasangarritasunaren eta ingurumenaren zaintzaren aldeko apustua areagotzeko, Agenda Berdean ezarritako ekintza-ildoari jarraituz.

Ekimen horri esker, Albia Taldea gizarte-erantzukizun korporatiboko estrategian zentratu da, eta ingurumenaren hezkuntzan eta ingurunearen zaintzan parte hartzera gonbidatu ditu bilbotarrak.

Erriberako merkatua euskal mitologiaren mundu magikoan murgilduko da Gabonetan. Abenduaren 18tik aurrera, 11 figura mitikoz osatutako erakusketa bat jarriko da Bilboko udal-merkatuaren solairuartean. Erakusketan, hainbat pertsonaiaren eskulturak ikusi ahal izango dira: Tartalo, Mari, Galtzagorri edo Basajaun, besteak beste. Pertsonaia horiek euskal kulturaren zati garrantzitsua dira, eta beraiei buruzko elezahar eta abenturek jende ugari dibertitu eta entretenitu dituzte.

Amaia Arranz artistak egin ditu figurak. Horiekin batera, panel bat jarriko da, euskarazko eta gaztelaniazko azalpen-legendarekin. Multzo hori Bilboko Udalaren Kultura Arloak Bilbao Aurrera 2021 planean onartutako sormen- eta kultura-proiektuetako bat da.

Bilboko Udaleko Osasun eta Kontsumo Sailak Ibiltarien Sarea ekimena bultzatzen du, eta hainbat ibilbide osasungarri eskaintzen ditu, zaintzen zaren bitartean Bilbo ezagutzeko. Gaur, asteartea, ibilbidea Labayruko Merkatuan amaitu da, hiria hornitzen duten zazpi udal merkatuetako batean, ekimenarekin bat datorren oso mokadu egokiarekin: osasungarria.

Ibiltarien Sarea osasuna sustatzeko programa da, eta modu irekian eskaintzen zaie euren eguneroko bizitzan ohitura osasungarriagoak txertatu gura dituzten 18 urtetik gorako bilbotar guztiei. Ibiltariak begirale/dinamizatzaile batek gidatzen ditu, eta ibilaldiaren erritmoa eta intentsitatea parte-hartzaileen gaitasun fisikora egokitzen ditu egunero. Gaurko ibilaldi oxigenatzailea amaitzeko modurik onena gure udal-merkatuetan, kasu honetan Labayrun, eskaintzen diren produktuen kalitatea dastatzea da.

Ser kateko “Hoy por Hoy Bilbao” programak “Bilbao Degustaren” edizio berri bat emango du atzo eta gaur Erriberako Merkatuko Gastronomia Ikasgelatik. Elkarrizketa-setean, besteak beste, Juan Mari Aburto Bilboko alkatea izan da. RAdio Bilbaok Bizkaiko sukaldari onenak entzutera gonbidatzen du, eta kultura gastronomikoari eskainitako hitzordu hau entzuleei eta, oro har, ostalarien gremioari eskaintzeko apustua egiten du.

Abenduaren 9an eta 10ean Erriberako Merkatutik eta abenduaren 13 eta 14an Vorwerk Bilbao dendatik emango den programak errezetak, sukaldaritzako trikimailuak, gastronomia purua eta sukaldariei egindako elkarrizketak eskaintzen ditu, besteak beste, Los Fueros jatetxeko Paul Ibarra edo San Mamés Jatetxeko arduradun Sendoa Calvo elkarrizketatuko ditu.

Itziar Ituño aktorea 7 x 3,5 metroko horma-irudiaren amabitxia izan da. Horma-irudi hori Aitziber Ibarguen Zallako artistak egin zuen joan zen asteburuan, La Bernarda jaialdiaren barruan, Erriberako Merkatuan.

Horma-irudiak tokiko zein nazioarteko historiako emakume ikoniko batzuk erakusten ditu. Merkatuaren bigarren solairuan dago, baserritarrak egon ohi diren gunetik hurbil, eta Bilbao Zerbitzuak eginiko lagapena da. Artelana gure hiriko emakume guztiei eskainita dago, batez ere merkatua osatzen eta elkargune bihurtzea bilatzen dutenei.

Artista, horma-irudi honen bidez, emakumeen arteko ehunaren garrantzia jasotzen saiatu da, zatika ehundutako manta bat simulatuta, non gutako edozein izan litekeen irudi anonimo bat agertzen den. Aktore basauriarrak, bere aldetik, adierazi du harro egoteko modukoa dela horrelako horma-irudi bat izatea Bilbon eta, batez ere, hain leku berezi batean, Erriberako Merkatuan.

Gabonak bertan direla, Bilboko Ostalaritzako Goi Eskolak Gabonetako gaiei buruzko ikastaroen eskaintza berria egin du. Ikastaroa abenduaren 1ean, 15ean eta 22an egingo da, eta sei errezeta egingo dira guztira: hasierako bi, lehenengo bi eta bigarren bi.

Lehen saioan, hasierakoak izango dira protagonista: perretxiko eta gulen nahaskia bainu marian eta muskuiluak tenpuran concassé tomatearekin. Bigarren klasean, hotzari aurre egiteko, bi koilara-plater egingo dira: batetik, marinel salda bat arrain eta moluskuekin, eta, bestetik, porru eta zigala krema bat. Azkenik, Mikel Escudero sukaldari eta irakasleak emango dio amaiera ikastaroari, bi errezeta eginez, txipiroiak plantxan, gari-zainzuriekin eta romesco saltsarekin, eta oilaskoa txilindron erara.

Ikastaroak 110 euroko kostua du, eta lehen aipatutako egunetan emango da, 18:30ean, Erriberako Merkatuko Sukaldaritza Eskolan (2. solairua).

Informazioa eta erreserbak

Historiako emakume diseinatzaile nabarmenen lana ezagutzeko eta argitara ateratzeko asmoz, Gasteizko Arte eta Goi Mailako Diseinu Eskolak (IDarte), azaroaren 18tik 25era bitartean Erriberako Merkatuan ikusgai egongo den Diseinuaren Emakume Aitzindariak proiektua sortu du.

Proiektua Eskolako Diseinu Grafikoko Graduko 2. mailako ikasleek gauzatu dute, Proiektuak II ikasgaian. Erakusketa 20 kartelek osatzen dute guztira, eta horietan ikasleek hautatu dituzten diseinuaren munduko 20 emakume aitzindariei buruzko informazio garrantzitsuena aurkeztuko da.