Gazteek gaur egun ez diote garrantzi handirik ematen janariari, eta horregatik ez dira hainbeste joaten Udal Merkatuetara.

Merkatu honek kalitate ezin hobeko produktu ugari ditu, eta postuak dituzten pertsonen tratua gertukoa eta familiarra da. Gauza bat baino ez dute faltan botatzen, jende gazteagoa bertako igarobideetan paseatzen eta bertako produktuak dastatzen. Bezero leialak eta bizitza osokoak izan arren, merkatuko postuak betetzen dituztenek belaunaldi-aldaketaren falta sumatzen dute.

Deustuko Merkatua, astean behin joaten diren eta bertako langileak izen eta abizenekin ezagutzen dituzten hirurogei urtetik gorako jendez betetzen da batez ere. Gazteek garrantzi gutxiago ematen diote janariari, eta kalitate oneko produktuak erosteari baino lehentasun gehiago ematen diote gizarte-bizitzari, aisialdiari eta oporretara joateari. Horregatik, supermerkatu edo merkataritza-gune handietan erostea aukeratzen dute. Nikolasek, merkatuko langileak, gazte guztiak tokiko saltoki horietan erosketak egitera animatzeko ematen duen aholkua, probatu eta alderatu ditzatela da, haragi, arrain eta barazkien kalitatea azalera handietan daudenena baino askoz hobea baita.

Informazio gehiago gure webgunean.

Bilboko Ostalaritza Goi Eskolak (ESHBI) jende guztiari zuzendutako hainbat tailer eta ikastaro gastronomiko eskainiko ditu uda honetan Erriberako Merkatuko Sukaldaritza Eskolan.

Ikastaroetan, ESHBIko profesionalek izokin-platerak egiteko teknika berriak irakatsiko dituzte, eta baita arroz-platerak prestatzeko aukera berriak ere. Gainera, euskal sukaldaritza tradizionalaren zale diren pertsonentzat bakailao ikastaroa ere emango dute, eta ikastaro horretan errezeta klasikoak prestatzen ikasiko dute: bakailaoa bizkaitar erara eta bakailaoa club ranero erara. Bestalde, sukalkiak eta marmitakoak ere, euskal janari tradizionalaren adibide bikain moduan, euren ikastaro propioa izango dute.

40 euroko ikastaro horiek, bi ordu inguruko iraupena dute, eta Erriberako Merkatuko bigarren solairuan dagoen Sukaldaritza Eskolan ematen dira. Ikastaro espres horiez gain, sukaldaritza munduan pixka bat gehiago sartu gura dutenentzat, ESHBIk sukaldaritzan hasteko ikastaro bat ere eskaintzen du, uztaileko astearte guztietan, 15:00etan.

Ordutegi berria datozen asteetan hasiko da

Urte osoan zehar bilbotarrak hornitzen dituzten udal-merkatuek –Erribera, Zabalgunea, Deustu, San Inazio, Labayru, Otxarkoaga eta Trauko– aldaketa txiki batzuk izango dituzte irekiera-ordutegietan datorren astelehenetik, ekainaren 14tik, aurrera. Ordutegi berria luzatu egingo da udako hilabeteetan, irailaren 14ra arte, Zabalguneko eta Traukoko merkatuetan izan ezik, horiek ohiko ordutegiarekin jarraituko baitute. Deustuko Merkatuaren kasuan, ordutegi berria 15ean hasiko da eta Labayrun bi hilabetez baino ez da aldatuko, uztailaren 4tik irailaren 5era. Kalitatezko zerbitzu ezin hobea eskaintzeko, Osasun eta Kontsumo Sailak merkatu horietan erosketak egitera animatzen ditu herritarrak, leku aparta direlako kalitatezko elikagaiak, bertakoak eta guztiz osasungarriak erosteko.

Merkatuak eta ordutegiak

• Zabalguneko Merkatua:
  • Ohiko ordutegiarekin jarraitzen du.
  • Astelehenetik larunbatera, 7:30etik 14:30era.
• Deustuko Merkatua:
  • ekainaren 15etik irailaren 15era, astelehenetik larunbatera, 8:00etatik 14:00etara.
  • Uztailean, ostiraletan, 17:00etatik 20:00etara irekiko da, eta abuztuan ostiral arratsaldetan itxita egongo da.
• Otxarkoagako Merkatua:
  • ekainaren 14tik irailaren 14ra, astelehenetik larunbatera, 8:00etatik 14:00etara;
  • ostiraletan eta jai-bezperetan, 17:00etatik 19:30era; eta abuztuan ostiral arratsaldetan itxita egongo da.
• San Inazioko Merkatua:
  • astelehenetik larunbatera, 8:00etatik 14:00etara, eta ostiral arratsaldetan, 17:00etatik 19:30era.
• Traukoko Merkatua:
  • ohiko ordutegiarekin jarraitzen du.
  • Astelehenetik larunbatera, 8:00etatik 14:00etara eta astelehenetik ostiralera arratsaldez, 17:00etatik 20:00etara.
• Labayruko Merkatua:
  • uztailaren 4tik irailaren 5era, astelehenetik ostiralera, 8:00etatik 14:00etara; uztailean arratsaldez itxita, ostiraletan izan ezik;
  • abuztuan arratsaldez itxita.
• Erriberako Merkatua:
  • ekainaren 15etik irailaren 15era, astelehenetik ostegunera, 8:00etatik 14:30era;
  • ostiraletan eta jai-bezperetan, 8:00etatik 14:30era eta 17:00etatik 20:00etara; eta larunbatetan, 8:00etatik 15:00etara.