Ba al dago Bilboko Udal Merkatuak baino espazio hoberik, nondik hasi jakiteko edo bizi-ohitura osasungarriak izaten jarraitzeko, kasu honetan elikaduran oinarrituta? “Zure osasunaren alde, mugi zaitez modu jasangarrian” goiburua duen 2021eko Europako Mugikortasunaren Astea dela eta, Bilboko Udaleko Mugikortasun eta Jasangarritasun Sailak ekitaldiz eta jardueraz betetako programazio osoa diseinatu du irailaren 16tik 22ra, eta Bilboko Udal-merkatuek ere hartu dute parte.

Irailaren 21ean, asteartean, Bilboko Udaleko Osasun eta Kontsumo Arloak antolatzen duen Ibiltarien Sarearen Programaren denboraldi berriaren aurkezpen-ekitaldiarekin bat etorriz, mugikortasuna eta ariketa fisikoa elikadura-ohitura osasungarriekin lotzeko ahalegina egin da, eta Gosari Osasungarrien programa gauzatu. Udal-merkatuek ere hartzen dute parte horretan. Hilaren 21ean, Ibiltarien Sareak ekimena Erriberako Merkatuan amaitu da, ohitura osasungarriei buruz berba egin duten berrogei bat pertsonarekin. Halaber, 2 fruta-pieza dituzten oihalezko poltsak banatu dira Mercabilbaorekin elkarlanean.

Informazio gehiago

Erribera, Zabalgunea, Deustu, San Inazio, Labayru, Otxarkoaga eta Trauko urte-sasoi berriaren erritmora egokitu dira, kalitatezko zerbitzu ezin hobea eskaintzen jarraitzeko.

Urtero bezala, hiriburutik bertatik elikagairik eta lehengairik onenak hornitzen dituzten Bilboko Udal Merkatuek, denboraldi-aldaketarekin ordutegiak aldatuko dituzte. Horrela, hiribilduan lan egiten duten zazpiek –Erribera, Zabalgunea, Deustu, San Inazio, Labayru, Otxarkoaga eta Trauko– ordutegi berria dute aste honetatik aurrera, urte-sasoi berriko erritmora egokitzeko eta kalitatezko zerbitzu ezin hobea eskaintzen jarraitzeko.

Oporren ostean, Erriberako Merkatuan dagoen Bilboko Ostalaritza Eskolak sukaldaritza ikastaro gehiago eskainiko ditu. Ikastaroak gehienez sei lagunentzat izango dira, eta asteartetik larunbatera bitartean emango dira, Erriberako ESHBI Sukaldaritza Eskolan, 18:30etik 20:30era aste barruan eta 11:00etatik 13:00etara larunbatetan.

Irailean zehar euskal sukaldaritzari buruzko ikastaro ugari eskainiko dira; beraz, gure gastronomiaren zale bazara edo kokotxa, bakailao, sukalki edo marmitako plater bat prestatzen ikasi gura baduzu, oso aukera onak dituzu eskaintzan. Nazioarteko sukaldaritza ere sukaldean sartuko da, jaki mexikarrak, cevitxeak eta risottoak prestatzen ikasteko klaseekin.

Ikastaro horiek jende guztiari daude zuzenduta. Ikasleen adina 18 urtetik hasi eta erretiratuetara doa, eta benetako sukaldari sutsuez eta profesionalez gain, sukaldaritzarekiko jakin-mina pizten hasi zaien hasiberri asko ere bertaratzen dira.

Izen-emateak Ostalaritza Eskolaren webgunean egin behar dira. Bertan, gainera, ikastaro bakoitzari buruzko informazio zehatzagoa aurkituko da.

Klaseak ematen diren Gelaz gain, Bilboko Goi Mailako Ostalaritza Eskolak (ESHBI) formatu pribatuko jarduerak egiten diren espazio txikiagoa ere badu, Gastronomia Gela. Pandemiaren ondorioz hilabete batzuetako geldialdiaren ostean, aukera hori berriz ere prest dago.

Horrela, ikastaro honetan, Gelak “Esperientzia gastronomikoa” izeneko jarduera eskaintzen du. Bertan, jendeak Merkatua eta bere postuak bisitatzen ditu, eta gero Gela horretara itzultzen da. Gelan, ESHBIko sukaldari batek aukeratutako menua prestatuko dio (txuletoia edo pintxoak). Prestaketa-prozesuan zehar, parte-hartzaileek sukaldariarekin elkarreragiteko, zalantzak kontsultatzeko, trikimailuak partekatzeko… aukera dute, gura duten guztietan parte hartzeko aukerarekin. Jarduera hori enpresa eta taldeek eskatuta egiten da, bi aldeei ondo etorriko zaien data bat bilatuz.

Gaur egun hartzen duen lekuan 50. urteurrena ospatzen duen urtean, Penintsulako iparraldeko elikagaien banaketa-zentro moduan erreferente den Mercabilbao bere jatorrira itzuliko da, irailean zehar Erriberako Merkatuan argazki eta informazio erakusketa bat instalatuz (hilaren 30era arte ikusi ahal izango da). Erakusketa 10 panelek osatzen dute, eta Bilboko merkatuaren irudi historikoekin hasten da. Garai hartan handizkako arrainaren salmenta instalazioen beheko aldean zegoen, eta fruta eta barazkiak, hegaztiak eta haragia inguruan eta hurbileko Erronda kalean zeuden. Ibilbide horrek Erribera Plaza zaharraren eta haren inguruaren hasierara garamatza. Puntu horiek estrategikoak ziren Gaztelako Erresumako eta itsasoz haraindiko merkantziak merkaturatzeko.

Gauzak horrela, hari narratiboak Mercabilbaok gaur egungo kokalekuan egin zituen lehenengo urteetan zentratutako panelekin jarraitzen du, 1971n eta ondorengo urteetan, hain zuzen ere. Garai hartan Arrain eta Fruta eta Barazki Merkatu Nagusiak Bilboko Erriberatik Basauriko Artunduagako zelaietara eraman ziren, duela 50 urteko maiatzean.

Erakusketak Merkatuaren mugarri suntsitzaileenarekin jarraitzen du: 1983ko uholdeekin. 80ko hamarkadan eta ondorengoetan, instalazioak suspertu egin ziren, eta, berreraikuntzarako eta modernizaziorako ahalegin, dedikazio eta baliabideei esker. Mercabilbao etorkizunerako itxaropen handiko ikuspegiarekin iritsi da 2021era. Bilboko eta inguruko eraldaketa ekonomiko eta soziala sustatzeko gai den zerbitzu-enpresa publikoa.

Ildo horretan, erakusketak elikagaien hornidura Merkatuaren plan estrategikoaren erreferentzia-puntuak ere erakusten ditu. Iraunkortasunaren eta erantzukizun sozialaren, kontsumo arduratsuaren eta elikagaien eta ingurumenaren xahuketaren aurrean duen konpromisoa; eta hurbileko merkataritzari eta ostalaritzari ematen dion laguntza, horiek direlako instalazioetan dauden handizkako enpresen bezero nagusiak eta Mercabilbaoren izateko arrazoia.

Familiakoa, atsegina, eramangarria eta konfiantzazkoa; horrela definitzen dute merkatariek euren bezeroekiko tratua.

Bere turismo giroarengatik nabarmentzen ez den merkatua bada ere, Otxarkoagako Merkatuko postuetako arduradunek indarrak batzen dituzte merkatu hori egunero bisitatzen duten dozenaka bizilagunak hornitzeko leku seguru eta fidagarria izan dadin. 38 urteko historian, postuen arduradunek euren bezeroak eta haien seme-alabak hazten ikusi dituzte; horregatik, merkatu honetako bertuterik handienetako bat, erosketa-saskia betetzeko bisitatzen duten pertsona guztiekin duten hurbiltasuna eta konfiantzazko tratua da.

Otxarkoagako merkatuaren beste abantaila bat, merkatariek bezeroekin duten harreman onarekin zuzenean lotuta dagoena, kalitatezko produktuak eta tokikoak saltzeaz gain, plater prestatuak ere saltzen dituztela da. Horrek bizitza asko errazten die denbora, adin edo lan-ordutegiarengatik egunero janaria prestatzeko aukerarik ez duten pertsonei.

Yolanda merkatuko merkatari eta harategiaren jabeak azaldu duenez, bezeroei ematen zaien tratua ez da saltoki handietan ematen zaiena, eta alderdi hori guztien artean indartu behar dela uste du, abantaila handia delako.

Informazio gehiago Otxarkoagako Merkatuan.

Produktuen kalitate ezin hobea eta merkatarien tratu pertsonala plus handia dira merkatu honetan kontsumitzeko orduan.

Erdigunetik bost minutura eta postu ugarirekin, Labayruko Merkatua dago, izen bera duen kalearen 8. zenbakian. Betiko bezeroek, aitite-amamek euren bilobekin, eta auzoko postuez arduratzen den jendearen tratuak erakarrita hurbiltzen diren gazteek… egunero bisitatzen dute merkatu hori, euren erosketa-saskia betetzeko.

Merkatu honetan gehien ikusten direnak ez diren arren, gero eta gazte gehiago ikusten da Labayruko merkatuan atzera eta aurrera. Produktuen gertutasunak eta 0 KMkoak izateak oso leku garrantzitsua betetzen dute, eta horrek gero eta gehiago erakartzen ditu gazteak.

Jose Felixek, merkatuko arrandegiko arduradunak, azaldu duenez, saltzen diren produktu guztien bertako jatorria, merkatuko merkatariek bezeroekin duten tratua eta konfiantza, eta postuen kokaleku egokia, egunero jende berria erakartzea eta euren ohiko bezeroekin jarraitzea lortzen duten alderdi positiboetako batzuk baino ez dira.

Informazio gehiago Labayruko Merkatuan.

Javier Hurtado sailburuak ekoizleen, tokiko produktuaren, kontsumitzaileen eta gastronomiaren arteko bitartekari gisa merkatuek betetzen duten eginkizuna azpimarratu du.

Javier Hurtado Turismo, Merkataritza eta Kontsumoko sailburua Erriberako merkatuan izan da gaur, Xabier Ochandiano Bilboko Udaleko Ekonomiaren Garapen, Merkataritza eta Enplegu zinegotziarekin eta Yolanda Díez Bilboko Udaleko Osasun eta Kontsumo Saileko zinegotziarekin batera.

Bisitan zehar sailburuak azpimarratu du merkatuek betetzen duten oinarrizko eginkizuna, “produktua kontsumitzaileengana hurbiltzen baitute eta nekazariak herritarrekin harremanetan jartzen baitituzte. Sukaldaritza ezin da produkturik gabe ulertu, eta horien jatorrira eramatea da sustatzeko modurik onena”.

Bertako produktuaren eta gastronomiaren arteko konexio hori nabarmen hautematen da, Erriberako merkatuaren kasuan bezala, Km0 produktu hori sukaldera eraman ahal izateko sukaldaritza-gela eta gastrotabernak jarri dituzten merkatu askotan.

Berez, merkatuak Turismo, Merkataritza eta Kontsumo Sailak sustatutako Euskadi Gastronomika Produktu Klubean sartzen joan dira. Kalitatezko gastronomia sustatzeko zenbait eskakizun irizpide eta konpromiso betetzen dituzten jatetxez, tabernaz, dendez eta establezimendu gastronomikoz osatutako sarea da.

Era berean, Yolanda Díez zinegotziarekin izan duen elkarrizketan kontsumoari buruzko gaiez hitz egin dute, besteak beste, Bilboko KIUBen nahiz Kontsumobideren bidez Euskadin egiten diren erreklamazioen egoeraz. Uztailera bitartean 7.800 erreklamazio baino gehiago izapidetu dira Kontsumobiden, eta horietatik gehienak (2.200) telefoniako eta telekomunikazioetako zerbitzuei buruzkoak dira, eta, esate baterako, 969 bidaiei eta garraioei buruzkoak, 760 etxetresna elektrikoei eta informatikari buruzkoak eta 490 hornikuntza-zerbitzuei buruzkoak.

Udal merkatuak gazteen artean lekua hartzen hasi dira. Mota askotakoak, leialak eta adin guztietakoak, horrelakoxeak dira Traukoko merkatuko bezeroak. Aniztasun horrek eta produktuen nahiz zerbitzuaren kalitateak hornitzeko leku ezin hobea bihurtzen dute merkatu hori. Merkatua kudeatzen duen Elkarteko arduradun eta fruta-denda postu baten buru den Emilio merkatariaren arabera, merkatuaren sustapen eta publizitate on batek jende gazteenaren presentzia handiagoa ekarriko luke eta auzoko negozio txikiek lekua irabaziko lukete azalera handien artean. Gaur egun bertako saltokiak bizitzen ari diren egoerarekin kontzientziatuta, gazteak gero eta gehiago ari dira horrelako establezimenduei laguntzen. Herritarrek gero eta gehiago kontsumitzen dute saltoki txikietan, eta gazteek argi eta garbi egiten dute produktuak gure hiriko merkatuetan erostearen aldeko apustua.

Informazio gehiago

Erriberako merkatua erreferente bihurtu da turismoaren sektorean, urtean bi milioi pertsonak baino gehiagok bisitatzen baitute. Bilbotarren hornikuntza gune nagusietako bat izateaz gain, Erriberako Merkatua milaka turistentzako intereseko lekua da. Udal merkatuak, askotan, hiriko kulturaren eta tradizioaren isla dira. Horixe da Erriberako merkatuaren kasua; izan ere, barazki, haragi eta arrain postu ugari izateaz gain, oso esperientzia erakargarriak eskaintzen ditu. “Merkatuetan gauzak gertatu behar dira”, horixe da Asierren leloa. Egunero dozenaka pertsona igarotzen dira bere postutik, eta horietako asko ohiko bezeroak direnez, oso tratu pertsonala jasotzen dute. Kalitatezko produktua oso prezio lehiakorrean saltzeaz gain, udal merkatuek eguneroko gaien zerrendan dagoen zerbait eskaintzen dute: jasangarritasuna. Tokiko eta hurbileko produktuekin egiten da lan. Gainera, harakin, arrain-saltzaile eta fruta-saltzaile bakoitza benetako espezialista da saltzen duen produktuan; beraz, produktua inork ez bezala ezagutzeaz gain, bezeroei produktua zelan prestatu eta zatirik onenak aukeratzen irakasten diete. Merkatu honetan bi bezero mota daude, oso desberdinak. Alde batetik, astelehenetik ostiralera joaten direnak, auzoko bezeroak, Alde Zaharrekoak, Atxurikoak, Bilbo Zaharrekoak… eta bestetik, asteburuko bezeroak, astean zehar lanean aritu ondoren Bizkaiko hainbat lekutatik merkatura joaten direnak.

Informazio gehiago atal honetan.