Epean ordainagiriak otsailaren 19tik martxoaren 25era kobratuko dira.

Epea igarotakoan, ordainagirien ordainketa betearazpen-bidetik eskatuko da, % 20ko errekarguarekin.

Kanpaina horretan, emakidaren titular diren 33.807 pertsona daude tasa ordaintzera deituta, aurreikusitako 619.155 euroko diru-bilketa gordina lortzeko.

Bilbao Zerbitzuak-ek otsailaren 19an irekiko du Bilboko eta Deustuko udal-hilerrien kontserbazio-, mantentze- eta garbiketa-zerbitzuak emateagatiko tasak ordaintzeko epea. Errolda helbideratuta duten pertsonei aldiaren azken egunean, hau da, martxoaren 25ean, kobratuko zaie, errekargu barik. Bankuan helbideratuta ez dauden gainerako ordainagirietarako, ordainketa epea otsailaren 19tik martxoaren 25era bitartekoa izango da. Ordainketa Kutxabankeko edo BBV Argentariako edozein bulegotan baino ezin izango da egin, banku-erakunde bakoitzak ezarritako egun eta orduetan. Horretarako, titularrek etxean jasoko duten inprimakia aurkeztu beharko da. Epea igarotakoan, ordainagiriak betearazpen-bidetik ordaintzea eskatuko da, % 20ko errekarguarekin.

Kanpaina honetan, Bilboko eta Deustuko hilerrietan kapera, panteoi, hilobi edo nitxo baten gaineko emakidaren titular diren 33.807 pertsonak ordaindu behar dute tasa hori. Bilbao Zerbitzuak-ek 619.155 euroko diru-bilketa gordina aurreikusi du kontzeptu horrengatik (BEZik gabe).

Gaur egun, iraungi gabeko emakida asko daude, ez helbiderik ez banku-daturik eman ez duten titular partikularren eskuetan. Ondorioz, ezin zaie ordainagiririk igorri, ezta zorren berri eman ere. Kasu horietarako guztietarako, Bilbao Zerbitzuak-ek ordainagiriak helbideratzea gomendatzen du, etxeetara bidaltzen den informazio-dokumentu bereko dagokion atala betez.

Kontserbazio-tasa horren bidez, emakiden titularren kontura, Bilboko eta Deustuko udal-hilerrietako gune komunak, bideak, zuhaitzak eta instalazio orokorrak kontserbatzen, mantentzen eta garbitzen laguntzen da. Horretatik kanpo geratzen dira ehorzketa-unitateak garbitzea eta mantentzea –emakidaren titularren erantzukizuna da–, bai eta panteoi komunitarioen kontserbazio-tasa ere.

Bilboko Hilerriak konstelazio propioa du, eta bertan gurasoek eta senideek haurdunaldian, erditzean edo jaio eta gutxira hil ziren ume guztiak oroitzen dituzte. Urtean zehar, familia asko 63. etxadian, Mungiako errepideko atetik Hilerrirako sarbidearen ondoan, dagoen Dolu Perinataleko Espaziora joaten dira, galdutako umetxoak oroitzeko. Memorial horrek galerak ikusarazten ditu, eta doluan laguntzen die gurasoei, ikusezina den mina, dolu perinatala, agerian utziz. “Hilerriari memorial bat eman gura genion, galera horiek ikusarazteko eta gurasoei doluan laguntzeko, ikusezina izaten jarraitzen duen mina agerian utziz. Inolako konnotazio erlijiosorik gabe, familiak nolabait indarberritzeko topagune bihurtzea espero dugu”, azaldu du Yolanda Díez Bilboko Udaleko Osasun eta Kontsumo zinegotziak.

Izarren Lorategi izenez ezagutzen den espazio hori, irekita dago behar duten pertsona guztientzat eta ez du inolako konnotazio erlijiosorik. Eraikitzeko, hilerriaren ingurunea eta sinbologia errespetatuko zuten eragin ekologiko txikia duten materialak erabili gura izan ziren. Horretarako, plaza bat eraiki zen, eta bertan ohorezko espazioa ematen zaie espazioaren erdian, horma perinatalaren parean, dauden oroitzapenezko artelanei. Gainera, plaza besarkatzen duten bi gabioi-hormei esker, gerturatzen direnek intimitate handia izango dute. Bi horma horiek 50 zentimetro inguru dituzte, eta atseden-elementu edo jarleku eta jardinera funtzioa betetzen dute; horrek indartu egiten du intimitate-sentsazioa.

Espazio horretara joaten diren familiek objektuak zintzilikatzeko eta uzteko edo umetxoak oroitzeko eta omentzeko lekua izan gura zutela adierazi zuten. Hainbat artelan aurre-aukeratu ziren familientzako dolu espazioaren diseinuan eta apaingarrietan parte hartzeko. Aurre-aukeraketa hori Bilbao Arte Fundazioko zuzendariak egin zuen, Bilbao Zerbitzuak-eko Zuzendaritzaren enkarguz. Azkenik, Bilbao Zerbitzuak-en Administrazio Kontseiluak hala erabakita, Bilboko Arte Fundazioko zuzendariak eta Dolu Perinatalari Laguntzeko Euskadiko Taldeko ordezkariek aholkatuta, Ivan Gomezek eta y Zuhar Iruretagoienak aukeratu ziren.

“Theaetatus” eta “Izar umeak”

Artista horren proposamenak “Theaetatus” du izena, sentiberatasunez eta poesiaz betetako lana, eta bertan intimitatea nabarmentzen da, “Izar umeak” leloarekin bat etorriz, jaio gabeko pertsona maitatua galdu duten familietan sortzen den hutsuneari erreferentzia eginez, eta hutsune horrek uzten dien inpaktuaren eta haustura markaren metafora adieraziz.

Espazio horretan parte hartzeko aukeratu den bigarren lana Zuhar Iruretagoienaren “Espacio para el duelo perinatal” izan da. Proposamen horrek, parte hartzeko eta gizartean umetxoak galtzearen errealitate latza ikusarazteko aukera ematen die familiei. Zuharren artelana, zulatutako eta barruan argiztatutako corten horma da. Horrela zeru berria irudikatzen da, eta bertan, izar batek sinbolizatzen du maite dugun pertsona hori.

Gune horren inaugurazioa, Esku Hutsik-ek, Euskadi eta Nafarroako Jaiotza inguruko, Jaiotza aurreko eta Jaio eta berehalako Dolurako elkarteak koordinatu zuen. Ekitaldi horretan, María González Esku Hutsik-eko presidenteak, hitzaldia eman zuen, eta horren eragina jasan duten familien hainbat testigantza ere izan ziren. Emakumeek osatutako “4kote” musika-laukoteak ekitaldi horretarako bereziki aukeratutako errepertorioa interpretatu zuen.

Ekitaldia amaitu zenean, inauguraziora joan ziren familiek kristalezko hodi batean utzi zituzten euren “umetxo izarraren” objektuak, ondoren Zuharrek diseinatutako horman sartzeko eta, horrela, euren maitea oroitzeko.

• Jarduera hau nitxoen hamar eraikinen teilatuetan eta hilerriko langileen aldagela-eraikineko bi isurialdeko teilatuan egin da.
• Iberdrolak jarri du abian instalazioa, eta sare elektrikoari konektatuta funtzionatzen du; hau da, energia-soberakina sarera isurtzen da, eta konpainia elektrikoaren fakturan kontsumoaren zati bat konpentsatzen da.
• Ekimen honi esker, Bilboko herritarren bizi-kalitatea hobetuko da, energia berriztagarriak tokiko ekoizpen-ekonomian modu aktiboan integratuko direlako eta klima-aldaketaren aurka borrokatuko delako.

Bilboko udal hilerrian eguzki-plakak instalatzeko eta abian jartzeko ekintza burutu egin da. Proiektuaren lehen fase honek 87.135 euroko aurrekontua izan du, eta hamabi astean egin da. Honela, Bilbao Zerbitzuak-ek lortu du uriko hilerria erabat jasangarria izan dadila, Garapen Jasangarrirako 2030 Agendan eta haren garapen jasangarrirako 17 helburuetan ezarritakoa betez. Yolanda Diez Osasun eta Kontsumoko zinegotziak azaldu duenez, ekimen honek Bilboko herritarren bizi-kalitatea hobetzen laguntzen du, tokiko ekoizpen-ekonomian energia berriztagarriak modu aktiboan integratuko direlako eta klima-aldaketaren aurka borrokatuko delako. Jarduera nitxoen hamar eraikinen teilatuan eta hilerriko langileen aldagela-eraikineko bi isurialdeko teilatuan egin da (zehazki, 14, 63 eta 16 blokeen eta mantentze-eraikinen artean). Sistemaren orientazioak eta makurdurak eta sistemaren gaineko itzalek dakartzaten galerak ahalik eta txikienak izateko moduan erabaki da moduluen antolaketa (186 dira guztira). Hain zuzen ere, instalazioa autokontsumo erregimenean dabil, sare elektrikoari konektatuta. Hau da, soberan geratzen den energia sarera sartzen da, eta horrela konpainia elektrikoaren fakturan soberakinak konpentsatzen dira. Hala, Bilbao Zerbitzuak-ek soberan sortutako energiaren etekinak eskuratzen ditu, kontsumorako beharrezkoa ez bada. Orobat, aurpegi biko panelek (nitxoen gainean daudenek) instalazioaren errendimendua hobetzen dute. Iberdrolak jarri du martxan instalazio fotovoltaikoa, autokontsumo modalitatean, soberakinen konpentsazio sinpletuan. Bikote Solar da enpresa instalatzailea. Nabarmendu behar dugu autokontsumoak tokiko lanpostuak eta kualifikazio handiko lanpostuak sustatzen dituela instalazioa diseinatzeko, muntatzeko eta ustiatzeko. Euskal energia-konpainiak, honelako autokontsumo-ekimenen bidez, bere estrategian sakontzen segitzen du. Izan ere, dagoeneko etxebizitzetan, industrian, komertzioan, nekazaritzan eta abeltzaintzan instalazio fotovoltaikoekin sortutako autokontsumoaren eremuan lanean ari baita. Hori guztia, “giltza eskuan” izeneko soluzioaren bidez, Smart Solar izenekoa, enpresentzat nahiz etxebizitzentzat dena. Soluzio horretan azterlana eta diseinu pertsonalizatua, administrazio-izapideak, muntaia, finantzaketa, mantentze-lanak eta web-tresnen bidezko monitorizazioa sartzen dira. Honelako instalazioen bidez urteko fakturan asko aurreztu daiteke: % 70eraino, etxebizitzak bateriarik badauka, eta % 40raino, bateriarik ez badauka. Bilboko Udal Hilerriko urteko elektrizitate-kontsumoa nahiko txikia da, baina azken helburua da espazio publiko jasangarria izan dadila ingurumenaren aldetik, eta energia berriztagarriak erabili ditzala, energia sortzeko instalazio elektriko fotovoltaikoak ezarriz. Gainera, Bilboko herritarren bizi-kalitatea hobetuko da honela, tokiko ekoizpen-ekonomian energia berriztagarriak modu aktiboan integratuko direlako eta klima-aldaketaren aurka borrokatuko delako. Bigarren fasean, Bilbao Zerbitzuak-ek ibilgailu elektrikoak kargatzeko 4 puntu jarriko ditu: haietako bi bisitariek erabiltzeko, eta beste biak hilerriko mantentze-lanetako ibilgailuentzat.

CO₂ emisioak murrizten ditu

Instalazioa ahalik eta etekin handiena ateratzeko proiektatu da. Potentzia nominala 70 kWP-koa izango da, gutxi gorabehera. Proiektu teknikoaren datuekin egindako simulazioak erakusten du jatorri berriztagarriko energia sortzeko sistema fotovoltaiko honen bidez murriztu egiten direla elektrizitatea modu konbentzionalean sortzean isurtzen diren CO₂ emisioak; zehazki, atmosferara igortzen diren CO₂ emisioak 21.893,8 kg. murriztuko lirateke urtero. Gainera, urtero 3.423,9 zuhaitz moztea saihestuko da horrela.

Bilboko Udal hilerria Cobradores de la noche film independente berriaren agertokiaren parte izango da. Jaxsak, Memento civitas (2018) edo Martirio staccato (2021) filmen zuzendariak, zuzenduko duen  filma azaroaren 13an, larunbatean, errodatuko da hilerrian, eta bertako aktoreek hartuko dute parte, super 8ko zuzendari ohi batetik hasi eta bizitza osoa horretan daraman antzerki irakasle bat arte.

Zine ekoizpen horrek kaleetan noraezean dabiltzan bi aseguru-kobratzaileren istorioa kontatzen du. Kobratzera doazen etxe bakoitzean pertsonaia bitxiak aurkituko dituzte. Kontrastatutako arketipoen bidez, bizitzari, heriotzari, zorionari eta gizabanako bakoitzak arazoei aurre egiteko eta inguruko pertsonekin harremanetan jartzeko dituen ikuspegiei buruz hausnartzeko aukera emango duen filma da.

Bilboko udal hilerrietan ere hasi da nabaritzen normaltasunaren itzulera, gaur, Santu Guztien egunean, bisitariak etengabe ari dira etortzen eta. Goizean goizetik nabaritu dira joan-etorriak, eta senideak eguna aprobetxatzen ari dira fisikoki gure artean ez daudenak bisitatzeko, hilobi, panteoi eta nitxoetan loreak eta sortak uztearen keinu sinbolikoa eginez. Aldi berean, hilobiak, apaintzen dituzte.

Bilbao Zerbitzuak-ek ordutegiak gogorarazten ditu: Bilbokoa 8etatik 18etara egongo da zabalik, eta Deustukoa, berriz, 8etatik 15etara. Gaur, azaroaren 1ean, Deustukoa ere 8etatik 18etara egongo da zabalik.

Bilboko Udal hilerriko kaperak Santu Guztien Eguneko Kontzertu lirikoa hartuko du azaroaren 1ean, 13:00etan. Kontzertuan “Bilbao Bel Canto” musika taldeak hartuko du parte. Hauek osatzen dute: Patricia Sesar sopranoak; Martín Barcelona tenoreak; Zuriñe de Diego biolinak; Miren de Diego biolak; eta Iñaki Velasco pianoak. Guztiak ere, ahots zein instrumentista moduan nazioko artearen panoraman ibilbide ezaguna dutenak, eta prestakuntza sendoa eta etengabe eguneratzen ari direnak, nazioko eta nazioarteko ekitaldietan parte hartzeari esker.

Laugarren kontzertu liriko honetan Kall Jenkins, Caccini, Mascagni, Cesar Franck, Sorozabal, Webber, Haendel, Guridi, Alcala de Penella, Mozart, Italiako musika napolitar tradizionaleko, Morricone, Olaizola eta Verdiren 14 obra interpretatuko dituzte, filmetako soinu-banden abestietatik hasi eta euskal zortzikoetara, kantu sakratu, aria eta erromantzetatik pasatuz, genero horiek entzule guztiengana hurbiltzeko helburuarekin, Bilboko udal-hilerriko kapera paregabearen barruan, Domu Santu Eguneko ospakizunaren egunean.

Kontzertura joatea librea izango da leku guztiak bete arte. Klaustroaren kanpoko megafonia konektatu egingo da, kaperan sartu ezin diren pertsonek kontzertua jarraitu ahal izan dezaten.

Gainera, berrikuntza gisa, kontzertua zuzenean emango da Telebilbaoren eta Bilbao Zerbitzuak-en YouTubeko kanalaren bidez, bertaratu ezin izan diren guztiek kontzertua ordenagailu, mugikor edo tablet baten bidez zuzenean, edo ondorengo edozein unetan ikusi eta entzun ahal izan dezaten.

Laugarren kontzertu liriko honek Sarria-Funetxea eta Grupo Albia hileta-zerbitzuen enpresen laguntza du.

Aurten, Deustuko eta Bilboko Hilerriak zabalik egongo dira, azaroaren 1ean ospatuko den Domu Santu Egunean joan nahi duten guztientzat.

Gainera, Zamudion/Derion dagoen Bilboko Udal-hilerriak herritarren arretarako langile kopurua indartuko du beste pertsona batekin urriaren 23an, 24an, 30ean, 31ean eta azaroaren 1ean, jendearen arreta hobetzeko eta bulegoetako aurrez aurreko arretan pilaketak saihesteko.

Ondorioz, bulegoetako jende aurreko ordutegia egun horietan goizeko 8:30etatik arratsaldeko 17:00ak arte luzatuko da.

Bestalde, Deustuko Udal hilerriak familiei ematen zaien arreta indartuko du Bilbao Zerbitzuak-eko lanbideetako pertsona batekin, goizeko 10:00etatik 14:00etara.

Familiei arreta emateko ordutegia luzatu denez eta egun horietan jendearentzat irekita egongo denez, Bilbao Zerbitzuak-etik, gehienak erakusten ari diren jokabide eredugarria berriro erakusteko eskatu gura diegu herritarrei, Udalarekin lankidetzan arituz prebentzioko osasun-arauak eta osasun-agintaritza eskudunak hartutako zuhurtasun- eta babes-betebeharrak betez, batez ere, kanpoaldean musukoa erabiltzeari dagokionez, pertsonen arteko segurtasun-tartea gorde ezin denean.

Garraio publikoa

Bilboko Udal-hilerria bisitatuko duten pertsonei, hilerrira joateko garraio zerbitzu publikoak erabiltzea gomendatzen zaie, autobusa eta trena.

• Euskotrenen L3 Kukullaga-Etxebarri/Lezama lineak tren zerbitzua du 7:30etik 22:30era, Otxarkoagako, Txurdinagako, Zurbaranbarriko, Zazpikaleetako (Alde Zaharra), Urribarriko eta Matikoko (Bilbo) geltokietan (informazio gehiago Euskotrenen webgunean).
• Bestalde, Bizkaibusek Bilbo eta Zamudion/Derion dagoen bertako udal-hilerria lotzen dituzten zenbait autobus-linea ditu. Linea bakoitzaren ordutegiak eta maiztasunak Bizkaiko Foru Aldundiaren webgunean kontsulta daitezke.

Bilboko Udal-hilerrian, urriaren 30ean eta 31n eta azaroaren 1ean hiriko lekurik bizienetako eta jendetsuenetako bat gure hilerria izango dela aurreikusiz ari gara lanean.

Sarrerak eta bisitak segurtasun osoz egin ahal izateko, aurten ere, datorren asteburuan eta azaroaren 1ean, goizeko 08:00etatik 18:00ak arte, Hilerriko sarrera nagusiko aparkalekuan egongo den boluntario dispositibo bat eta oinarrizko bizi-euskarriko anbulantzia bat Bilboko udal-hilerrira joatea hitzartu dugu Bizkaiko Gurutze Gorriarekin.

Zerbitzu berezi horren bidez, Bilboko udal hilerriko bisitariek izan dezaketen edozein istripu edo kalte fisikoren aurrean osasun-estaldura egokia eskaini gura da.

Modu berean, hilerriko sarrera nagusian Gurutze Gorriko lau boluntario prest egongo dira, bi aulkirekin, mugikortasun murriztua duten eta Bilboko udal-hilerriaren barrualdetik mugitzeko eskatzen duten bisitariak leku batetik bestera eramateko.

Gainera, Bilboko Udal-hilerriak bi aulki elektriko ditu, eta horiek ere bisitarien eskura jarriko ditugu, pertsona horiei bisita egitea errazteko, euren laguntzaileentzat ere erakargarriagoa, erosoagoa eta errazagoa izan dadin, haiek baitira aulkia maneiatu behar dutenak, ez erabiltzailea/onuraduna. Horrela, Bilboko hilerriaren irisgarritasun unibertsalaren hobekuntzan aurrera egiten dugu.

Bilboko Udal Hilerrira jende asko joatea aurreikusten da, urriaren 23 eta 24ko asteburuetan eta 30 eta 31n, hurrenez hurren, eta azaroaren 1ean, eta horrek elkarbizitza arazoak eragin ditzake esparruaren barruan, batez ere ibilgailuak aparkalekutik sartu eta irtetearen ondorioz.

Segurtasuna bermatu ahal izateko eta hilerrira egiten duten bisitan pertsonentzako arrisku-egoerak saihesteko, Bilboko Udaltzaingoaren agenteen laguntza izango da, eta haien zeregin nagusia izango da Bilbao Zerbitzuak enpresako langileei laguntzea hilerriaren barne-antolaketan, hala nola sarbideen kontrolean eta abarretan, eta gatazka kasuetan edo indarrean dagoen araudia betetzen ez denean esku hartzeko.

Ibilgailuen sarbidea eta aparkalekuak

Bilboko Udal Hilerriak 67 plaza ditu, eta horietatik 2 mugikortasun murriztuko txartela duten pertsonentzat erreserbatuta daude, hilerrirako sarrera nagusiaren erdialdean ibilgailuak aparkatzeko.

Ibilgailuen sarbidea erraztuko da Bilboko Udal Hilerrira, Txorierri BI 737-Erandio / Larrabetzu errepidean bisiten arintasuna bermatzeko eta zirkulazio-arazoak eta aparkaleku irregularrak saihesteko.

Azaroaren 1ean leku bat gordeko da sarreraren eskuinaldean, Bilbao Zerbitzuak zerbitzuaren bulegoen ondoan, larrialdietako ibilgailuentzat, hileta-zerbitzuetako enpresentzat, mugikortasun murriztuko txartela indarrean duten ibilgailuentzat, baldin eta txartelaren titularrak ibilgailua okupatzen badu, eta egun horretan hilerrira sartzeko baimena duten pertsonen segizioan parte hartzen duten ibilgailuentzat, bai eta baimendutako beste pertsona batzuentzat ere.

• Aurten, berrikuntza gisa, Bilbokoak dolu perinataleko gune bat izango du, oroitzapenerako topaleku pertsonalizatua eta intimoa, haurdunaldian, erditzean edo erditze ondoren alaba edo semea galdu duten familia guztientzat.
• Garraio publikoa erabiltzea gomendatzen bada ere, Bilboko Udaltzaingoaren eta Gurutze Gorriaren laguntza izango da eta Covidaren aurkako neurri guztiak beteko dira.
• Urriaren 30ean eta 31n, eta azaroaren 1ean bulegoetako aurrez aurreko arreta indartu egingo da.
• Aurten kontzertu liriko klasikoa berreskuratuko da; librea izango da edukiera bete arte, eta aurten Telebilbao tokiko telebista-katetik eta Bilbao Zerbitzuak-en youtubeko kanalaren bidez emango da zuzenean.

Datorren azaroaren 1ean Domu Santu Eguna da, eta hori giroan nabaritzen da. Iaz, inguru guztietan zegoen birusak eta horri eusteko neurriek eragotzi egin zuten bilbotar askok euren hildakoei bisita egitea, bizi ziren herriko hilerrietara soilik joan zitezkeelako. Baina 2021. urte honetan, pertsona maitatuenen panteoiak, nitxoak edo hilobiak berriro txukundu ahal izango dituzte, Bilboko eta Deustuko hilerriak berriro irekita egongo direlako joan nahi duten guztientzat. Aurten, berrikuntza gisa, Bilboko hilerriak dolu perinataleko gune bat izango du, oroitzapenerako topaleku pertsonalizatua eta intimoa, haurdunaldian, erditzean edo erditze ondoren alaba edo semea galdu duten familia guztientzat.

Ordutegiei dagokienez, Bilbokoa 8etatik 18etara egongo da zabalik, eta Deustukoa, berriz, 8etatik 15etara, azaroaren 1ean izan ezik, egun horretan 8etatik 18etara egongo baita herritarrentzat irekita.

Dolu Perinatalerako gune berria

Ama edo aita izatearen ametsa, askorentzat, hastera zihoan unean bertan amaitzen da. Haurdunaldian edo jaiotzeko unean seme edo alaba bat galtzea oso egoera traumatikoa eta mingarria da, eta dolu perinatalak ikusezin izaten jarraitzen du gizartean. Bilboko Udaleko Osasun eta Kontsumo Sailak isiltasun hori apurtu gura izan du, Bilboko udal-hilerrian intimitate- eta oroitzapen-espazio pertsonalizatu bat ezarriz, haurdunaldian, erditzean edo erditu ostean seme-alaba galdu duten familia guztientzat. Gunearen aurkezpen ofiziala laster egingo da. Dolu Perinatalari Laguntzeko Euskadiko Taldearen lankidetzarekin eta parte-hartzearekin, irekiera sinbolikoa azaroaren 1ean izango da.

Espazio horren bidez, familia horiei arreta emateko dagoen hutsunea bete, haien galerak ikusarazi, eta gurasoei doluan lagundu gura da. Memoriala irekia eta konnotazio erlijiosorik gabea da, 63. etxaldean dago, Mungiako errepideko atetik Hilerrira sartzeko sarbidearen ondoan, eta 30 metro karratuko azalera du intimitatean egoteko.

Covid-aren aurkako neurriak eta langile gehiago

Zalantza barik, udal-hilerrien kudeaketaren urteko egunik garrantzitsuenetako bat da. Hori dela eta, Bilbao Zerbitzuak-ek ekintza-plan berri bat jarri du martxan, hilerriak duintzeko eta haien zerbitzuaren kalitatea hobetzeko eta, aldi berean, pertsonen bertaratze masiboaren ondorioz gura ez den kutsadura-gune bihur ez daitezen. Ildo horretan, gogorarazten da musukoa erabili behar dela pertsonen artean gutxienez 1,5 metroko segurtasunezko distantzia gordetzea ezinezkoa den egoeretan.

Modu berean, hilerriko sarrera nagusian gel hidroalkoholikoa hornitzeko lau puntu jarriko dira bisitarien eskura, beste bi kaperarako sarbidean eta beste bi Derioko Mungialde Etorbidea kaleko sarreran, eta, horrez gain, gel hidroalkoholikoa banatzeko ohiko guneek eskuragarri jarraituko dute, errausketa-laberako sarbideetan eta Bilbao Zerbitzuak-en bulegoetan.

Bulegoetako aurrez aurreko arreta ere indartu egingo da urriaren 30ean eta 31n, eta azaroaren 1ean pertsona bat gehiagorekin. Ondorioz, jende aurreko ordutegia goizeko 8:30etik arratsaldeko 17etara luzatuko da.

Udaltzaingoaren eta Gurutze Gorriaren laguntza

Bilboko Udalak garraio publikoan joateko eskatu arren, euren ibilgailuan doazen pertsonek hilerrira sartzeko izango duten aukera bakarra sarrera nagusia izango da, Txorierriko BI 737-Erandio/Larrabetzu errepidetik, hain zuzen ere. Ibilgailuek horretarako erreserbatutako eta egokitutako guneetan aparkatu beharko dute. Urriaren 30ean eta 31n eta azaroaren 1ean, Bilboko Udaltzaingoak etengabeko zerbitzu berezia emango du sarbideetako trafikoa antolatzeko eta segurtasuna bermatzeko. Hiru egun horietan, Bilbao Zerbitzuak-ek Gurutze Gorriko boluntarioen eta anbulantziaren laguntza ere izango du, bisitariek izan dezaketen edozein istripu edo kalte fisikoren aurrean osasun-estaldura egokia emateko.

Kontzertu lirikoa

Aurten Bilboko Udalak kontzertu liriko klasikoa berreskuratuko du. Emanaldia azaroaren 1ean izango da, Bilboko Udal hilerriko kaperan, 13etan. Domu Santu Eguneko ohiko Meza 12etan izango da eta Bilboko gotzainak emango du.

Kontzertu lirikoak bere laugarren edizioa beteko du, aurten “Bilbao Bel Canto“ musika taldearen eskutik. Hauek osatzen dute: Patricia Sesar sopranoak, Martin Barcelona tenoreak, Alfonso Rodriguez biolinak, Miren de Diego biolak eta Iñaki Velasco pianoak. Besteak beste, ibilbide garrantzitsua duten Bilboko musikari horiek Kall Jenkins, Monteverdi, Caccini, Donizetti, Bach, Franck, Sorozabal, Webber, Guridi, Olaizola, Morricone eta Verdiren 14 lan interpretatuko dituzte. Kontzertura joatea librea izango da leku guztiak bete arte. Aurtengo beste berrikuntzetako bat da kontzertua zuzenean emango dela Telebilbao tokiko telebista katearen eta Bilbao Zerbitzuak-en youtube kanalaren bidez.

Domu Santu Egunerako programatutako ekitaldiek Sarria-Funetxea eta Grupo Albia enpresen laguntza dute.

Gogobeteze-inkestak

Iristen direnean, bisitariek inkesta bat jasoko dute, orain arte egindako hobekuntzak eta jasotako zerbitzuak baloratzeko. Zerbitzuak, horretarako kontratatutako pertsonen laguntza izango du, eta 10etatik 13etara bitartean emango dituzte inkestak eta horien edukia azalduko dute.

Hobekuntzak

Bilbao Zerbitzuak-ek hainbat hobekuntza egin ditu aurten kanposantuko zerbitzu eta instalazioetan. Dolu perinatalerako gune bat sortu da, oroimen-iturri bat eraiki da Covid-19ko osasun-krisian lurperatutako 961 pertsonak omentzeko eta gogoratzeko, Bilboko hilerriko harrizko horma perimetrala zaharberritu eta finkatu da, adineko pertsonentzako bi aulki elektriko erosi dira, eta, laster, eguzki-plakak jarriko dira hamar bat eraikinen estalkien gainean eta kanposantuko langileen aldagelako bi isurkiko teilatuaren gainean. Ohiko pintura-, garbiketa- eta lorezaintza-lanak egiteaz gain, jarraipena eman zaio iaz hasitako hilerriaren paisaia-eraldaketa prozesuari./p>