Lanaren errutinara itzulita eta ikasturtea hastear dagoela, Bilbao Ostalaritza Goi Eskola (ESHBI) Erriberako Merkatura itzuliko da bere ikastaroekin. Indarrez eta berritasunez beteta, masterclass eta ardo eta gourmet produktu dastatzeak Eskolako jatetxeko maitrearen eskutik. Gainera, sukaldaritzako apar errezeta berriak eta izokin ikastaro berri bat ere egingo dira.

“Oporrak atzean uztea gogorra da, eta ikastaro hauek, zalantza barik, deskonektatzeko eta une atseginak igarotzen lagunduko duten jarduerekin oporraldiaren osteko denboraldiari aurre egiteko aukera ematen dute” esanez parte hartzera animatu du Yolanda Díez Bilboko Udaleko Alkateorde eta Osasun eta Kontsumoko Zinegotzi Ordezkariak.

Ikastaro guztiak ESHBIren webgunean kontsulta daitezke.

Bilboko udal merkatuak ere urdinez tindatzen ari dira egunotan, Bilbok abuztuaren 20tik 28ra ospatzen duen Aste Nagusia dela eta. Aste Nagusian murgilduta, tabernak eta jatetxeak bertatik elikatzen dira lehengairik onenak aukeratuz pintxo eta plater onenak eskaintzeko eta haiekin gozarazteko; erakargarri eta deigarriak dira Bilbo bisitatzeko Aste Nagusia aukeratzen duten turistentzat; familiarteko mahaiek ere ahaleginak egiten dituzte bazkari eta afarien inguruko jai-giroko konpainia atseginean egiten diren topaketetan…: Yolanda Díez Bilboko Udaleko Alkateorde eta Osasun eta Kontsumoko Zinegotzi Ordezkariak eskertu egin ditu “Aste Nagusian gure udal-merkatuetara egindako bisitaldiak, batez ere saltzaileak, inoiz baino prestatuago daudelako zerbitzurik onena, hurbilekoa eta profesionala eskaintzeko, zapia lepoan jarrita jaia kutsatuz”.

Hain gustuko ditugun sasoiko elikagaiek ez dute etenik Erriberako, Zabalguneko, Deustuko, San Inazioko, Labayruko, Otxarkoagako eta Traukoko udal-merkatuetako postuetan, eta ordutegi hauetan daude irekita:

• Zabalguneko Merkatua: ohiko ordutegiari eusten dio. Astelehenetik larunbatera, 7:30etik 14:30era.
• Deustuko Merkatua: ekainaren 15etik irailaren 15era, astelehenetik larunbatera, 8etatik 14etara. Uztailean ostiral arratsaldeetan 17:00etatik 20:00etara irekiko da eta abuztuan ostiral arratsaldeetan itxita egongo da.
• Otxarkoagako Merkatua: ekainaren 1etik irailaren 1era, astelehenetik larunbatera, 8etatik 14etara; ostiraletan eta jai-bezperetan, 17:00etatik 19:30era; eta abuztuan, ostiral arratsaldeetan, itxita egongo da.
• San Inazioko Merkatua: ekainaren 14tik irailaren 14ra, astelehenetik larunbatera, 8etatik 14etara, eta ostiral arratsaldeetan, 17:00etatik 19:30era.
• Traukoko merkatua: ohiko ordutegiari eusten dio. Astelehenetik larunbatera, 8etatik 14etara eta arratsaldeetam, astelehenetik ostiralera, 17:00etatik 20:00etara.
• Labayruko merkatua: uztailaren 4tik irailaren 7ra, astelehenetik ostiralera, 8etatik 14etara; uztailean arratsaldez itxita egongo da, ostiraletan izan ezik; abuztuan arratsaldez itxita egongo da.
• Erriberako Merkatua: ekainaren 14tik irailaren 15era, astelehenetik ostegunera, 8etatik 14:30era; ostiraletan eta jaiegun bezperetan, 8:00etatik 14:30era eta 17:00etatik 20:00etara; eta larunbatean, 8etatik 15etara.

Hiriko Merkaturik ikonikoenak sukaldaritza-tailerren eta Aste Nagusiko ohiko Gastronomia Lehiaketaren 43. Edizioaren aurkezpen ekitaldia hartu zuen abuztuaren 10eko goizean. Lehiaketa Bilboko Konpartsek eta Aste Nagusirako Jai Batzorde Mistoak antolatu dute, eta horrekin batera sukaldaritza tailerrak, bertako produktuak, askotariko landare-aukerak eta umeentzako “Gastrotxiki” sukaldaritza eskola izango dira.

Urtero bezala, Bilboko Konpartsek hainbat lehiaketa gastronomiko antolatuko dituzte Aste Nagusian. Aurkezpena Erriberako Merkatuan izango da abuztuaren 10ean, 11:00etan.

Bilbao Zerbitzuak-ek ilusio handia du ekitaldi hori Hiriko Udal Merkatuetako batean hartzeko. Izan ere, Erriberako Merkatua bezala, Aste Nagusia elementu ikonikoa da bilbotarren artean. Lehiaketak euskal sukaldaritza tradizionalean ohikoak diren plateretan oinarritzen dira, Marmitakoa edo Bakailaoa Pil Pil eran, esaterako, eta bertako eta kalitate goreneko produktuekin egiten dira, Bilboko Udal Merkatuetako postuek eskaintzen dituztenekin, besteak beste.

Gastronomia lehiaketak abuztuaren 22an, astelehenean, hasiko dira, lehena patatak saltsa berdean, eta abuztuaren 28ra arte luzatuko dira. Azken egunean buztan gisatuaren lehiaketa izango da. Tartean, beste bost lehiaketa egingo dira:

• Astelehena 22: Patatak saltsa berdean
• Asteartea 23: Patata tortilla
• Asteazkena 24: Txipiroiak euren tintan
• Osteguna 25: Bakailaoa bizkaitar erara
• Ostirala 26: Bakailaoa Pil Pil erara
• Larunbata 27: Marmitakoa
• Igandea 28: Buztan gisatua

Lehiaketaren zazpi egunetan zehar mila kazola inguru aurkeztuko dira. Aurtengo epaimahaia sukalde garrantzitsuetako taldeek, sukaldaritza beganoan espezialistek, Alde Zaharreko betiko tabernen jabeek eta gastronomiaren munduarekin lotura handia duten pertsonek osatuko dute, Bilbao Bizkaia Slow foodeko kideek, besteak beste.

Uztailean eta abuztuan, Udal Merkatuetako fruta eta barazki postuak kolorez betetzen dira eta udarekin erlazionatzen diren usainek giroa bustitzen dute. Gerezia, arana, melokotoia, meloia edo nektarina moduko frutek eta lekak, letxuga, arbia, piperra, errefaua, erremolatxa, tomatea eta azenarioa bezalako barazkiek, tokiko eta kalitatezko produktu onenen bila udal merkatuetara hurbiltzen diren pertsona guztien zentzumenak betetzen dituzte.

“Udan, sasoiko produktuak izaten dira postuetako erregeak, eta egunero dozenaka bilbotar eta turista joaten dira Udal Merkatuetara hiriko produkturik onenen bila. Hori dela eta, Bilbao Zerbitzuak-etik horrelako produktuak kontsumitzera animatzen ditugu herritarrak, gozoak izateaz gain, oso osasungarriak direlako”, adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi Ordezkariak.

Gastronomia Bilboko kulturaren parte da, eta hirira iristen diren bisitarientzat ezinbestekoa da Udal Merkatuetan geldialdia egitea plater on guztiak produktu onak aukeratuz hasten direla jakiteko.

“Bilboko udal merkatuek gertuko eta sasoiko produktu freskoen oso eskaintza zabala eskaintzen dute eta preziorik onenean, eta horiek dira, hain zuzen ere, hiria mundu mailako gastronomiaren mapan jarri duten plater tradizionalak eta abangoardiakoak egiteko oinarria. Eta bisitatzen gaituztenek badakite hori”, adierazi du Yolanda Díez Bilboko Udaleko Alkateorde eta Osasun eta Kontsumo Zinegotzi ordezkariak.

Ahaztu barik, gainera, Bilboko udal merkatuetatik paseatzeak, merkatu horiek dauden eremu bakoitzaren idiosinkrasia ezagutzeko aukera ematen duela. Hala, azpimarratzekoa da Erriberako Merkatua, hasieran, Bilboko merkataritzaren epizentroa izan zela, eta hori bertako korridoreetan nabaritzen jarraitzen da. Zalantza barik, udal merkatuak bisitatzea hiriaren historia, gaur egungo hiria bihurtu arte zelan sortu eta hazi den, ezagutzeko modu bat da.

Bilboko Ostalaritza Goi Eskolak (ESHBI) Erriberako Merkatuko Sukaldaritza Eskolan ematen dituen sukaldaritza ikastaroek geldialdia egingo dute udako oporretan, indarrez itzultzeko eta irailean ideia eta proposamen gastronomiko berriak eskaintzeko. Hori bai, ikasleei azken ikastaroak eskaini ondoren egingo dute, uda honetan senideak eta lagunak harritzeko aukera izan dezaten.

Uztailaren 29an, ostiralean, Tako mexikarrei buruzko ikastaroa emango da. Ikastaro horretan, bertaratzen direnek Mexikoko gisatuen sekretuak ikasiko dituzte, bai eta saltsa perfektua egiteko gakoak ere. Tailer gastronomiko horiek uztailaren 30ean, larunbatean, emango diote amaiera denboraldiari, pintxoak egiteko ikastaroarekin.

“Itzuli arte esaten diegu agur, aho zapore bikainarekin. Gozamena da ehunka bilbotarrek eta turistek urtero tailer horiekin gozatzen eta ikasten dutela ikustea, Erriberako Merkatua ezagutzeaz batera, eta prestatzeko udal merkatuetako postu guztiak eskura jartzen dizkieten tokiko eta kalitatezko produktuak erabiltzen dituztela jakitea”, adierazi du Yolanda Díez Bilboko Udaleko Alkateorde eta Osasun eta Kontsumo Saileko Zinegotzi Ordezkariak.

Otxarkoagako auzotarrak adi-adi izan ditu azokako bezero eta erabiltzaileak, eta hegaluze-tartarez egindako pintxoak, olioz eta eztiz maneatutako entsaladak eta onddo-risottoa prestatu ditu.

Otxarkoagako udal azokan, gaur goizean, auzotar oso berezi bat izan da ikustaldia egiten, Adrián Rejón TVEko “Masterchef” telebista-saioko lehiatzailea, hain zuzen, zeina bertatik bertara jardun baita sukaldean, udal azokaren erabiltzaile guztien aurrean. Yolanda Diez Bilboko Udalaren alkateorde eta Osasun eta Kontsumo Saileko zinegotzi ordezkariak lagundu dio sukaldean. Sukaldaritzako talent saio ospetsuan ari da lehiatzaile Adrián karismaduna, eta hegaluze-tartarez eta ahuakatez egindako pintxoak, olio, ziape eta eztiz maneatutako entsalada eta koilaratxoetan dastatzeko onddo-risottoa prestatu ditu.

“Esperientzia zinez atsegina da Adrián Rejónen mailako sukaldariak eta udal azokak elkartzea, oraingoan Otxarkoagakoan bezala; izan ere, hangoxe auzotarra baita Adrián. Sasoiko produktuak hautatu ditu maneatzeko, osasungarriak eta gure udal azoketan aurkitzen errazak. Ni neu ere animatuko naiz etxean prestatzera”, adierazi du Yolanda Díez alkateordeak.

Telebistako lehiaketa arrakastatsu horretako sutegien artean, sukaldarigaien bitxikeria eta kontutxo asko ateratzen dira agerira. Adrián, Bilboko Otxarkoagako auzotarra, telebista-saio bakoitzean saiatu da epaileak harritzen berak maneatutako jakiekin, eta bere amaren indaba- eta dilista-eltzekariak nabarmendu izan ditu, bere gogokoenak.

Gasteizko Hornidura Merkatuan erakusgai egon ondoren, Bilboko Erriberako Merkatuak “30 emakume ahaztezin-30 mujeres inolvidables” erakusketa hartuko du irailera arte. Erakusketa Emakunde-Emakumearen Euskal Erakundeak antolatu du, eta 30 akuarela biltzen ditu. Horietan, Elena Ciordia artistak hainbat diziplinatan, idazketan, bertsolaritzan, pinturan, argazkigintzan, kirolean, musikan, fisikan, politikan, kazetaritzan, ikerketan, edo irakaskuntzan, besteak beste, nabarmendu diren gure herrialdearen historiako emakumeak erretratatzen ditu. Akuarela horiek emakume horien bizitzari buruzko informazioa ematen duten ikus-entzunezko beste material eta elementu batzuekin osatzen dira.

Yolanda Díez Bilboko Udaleko Alkateorde eta Osasun eta Kontsumoko Zinegotzi Ordezkaria bat etorri da Izaskun Landaida Emakundeko zuzendariarekin, eta adierazi du denbora luzean jasan duten aitortzarik ezak emakumeak ikusezin egin dituela, gaur egun ezagutzen dugun mundua eraikitzeko ekarpen handia egin duten arren. “Erakusketa honek omenaldia egiten die, baina, aldi berean, gizartean hain ezagunak ez diren beste lan batzuetan bizitzari eutsi ahal izan zioten emakumeentzat ere omenaldia izan gura du”.

Horrela, izendatuak eta omenduak izatea merezi duten historiako beste emakume asko daudela jakinda, erakusketa herritarrek emakume horien oroimenari egiten dioten ekarpenerako gune ere izan gura du. Helburu horrekin, erakusketan, gogora ekarri beharreko emakume gehiago proposatzeko gonbidapena egiten zaie bisitariei, edozein arlotan nabarmendu diren emakumeak. Euren herrietako edo euren familietako erreferentziazko emakumeak proposatzera eta haien historia kontatzera gonbidatzen zaie. Ekarpen hori egiteko, #mujeresinolvidables #emakumeahaztezinak traolak erabili ahal izango dira sare sozialetan.

Erakusketan aintzatesten diren emakumeak Emakundek argitaratutako “30 emakume ahaztezin-30 Mujeres inolvidables” liburuan ere jasota daude.

Ostegun honetan Canal Cocina te pasa el delantal programaren atal bat grabatuko dute Erriberako Merkatuan. Programa berri horretan, pertsona anonimoek eta sukaldaritzan aritzen ez direnek euren plater izarra dela uste dutena egiten erakutsiko dute. Kasu honetan, Alberto, Erriberako Merkatuko sukaldari afizionatua eta ohiko bezeroa, izango da programaren protagonista eta errezeta egiteko osagaien bila merkatuko postuak bisitatuko ditu.

“Esker onez hartzen dugu programa honek atal bat grabatzeko Erriberako Merkatua aukeratu izana, Bilboko leku enblematikoa eta interesgarria delakoan. Gainera, postuetako jabeek bezeroei ematen dieten gertuko tratu profesionala balioesteko aukera izan dugu, baita Udal Merkatuetan egunero saskiak betetzen dituzten bilbotarrek haiengan jartzen duten konfiantza ere”, adierazi du Yolanda Díez Bilboko Udaleko Alkateorde eta Osasun eta Kontsumo Saileko Zinegotziak.

Programan zehar, Albertok merkatuko bere konfiantzazko arrandegia bisitatuko du. Produktuak berrikusi ondoren, zapoa aukeratuko du, ondoren bere etxean prestatuko duen errezetaren osagai nagusia.